AP BJP: సినిమా హాళ్లు, బార్లకు లేని నిబంధనలు ఉత్సవాలకా?: భాజపా

విజయవాడ: ఆంధ్రప్రదేశ్‌లో హిందూమతంపై దాడులు జరుగుతున్నాయని భాజపా నేత కన్నా లక్ష్మీనారాయణ ఆరోపించారు. 150పైగా ఇటువంటి ఘటనలు జరిగినా అరెస్టులు లేవని ఆగ్రహం వ్యక్తం చేశారు. ఈ మేరకు కన్నాతో పాటు భాజపా నేతలు, వీహెచ్‌పీ నేతలు విజయవాడలో గవర్నర్‌ను కలిశారు. వినాయక చవితి ఉత్సవాల నిర్వహణపై ఆయనకు వినతిపత్రం అందజేశారు. అనంతరం భాజపా నేతలు మీడియాతో మాట్లాడారు.

వినాయకచవితి పండగను ఇంట్లోనే జరుపుకోవాలన్న జీవోను ఖండిస్తున్నామని చెప్పారు. సినిమా హాళ్లు, స్కూళ్లు, బార్లకు లేని నిబంధనలు ఉత్సవాలకా? అని ప్రశ్నించారు. గవర్నర్‌ జోక్యం చేసుకొని ఉత్సవాలకు అనుమతి ఇవ్వాలని కోరామన్నారు. ప్రభుత్వం అనుమతి ఇవ్వకున్నా పండగ జరిపి తీరుతామని కన్నా స్పష్టం చేశారు.