IND vs SA: దక్షిణాఫ్రికా పర్యటనలోకొవిడ్‌ కేసులు వచ్చినా...

దిల్లీ: ఆటగాళ్లు లేదా సహాయ సిబ్బందిలో కొవిడ్‌-19 వచ్చినా భారత్‌, దక్షిణాఫ్రికా మధ్య టెస్టు, వన్డే సిరీస్‌లు కొనసాగుతాయి. రెండు దేశాల బోర్డులు ఇందుకు అంగీకరించాయి. కరోనా పాజిటివ్‌ వచ్చిన వారితో సన్నిహితంగా ఉన్న వారికి ఐసోలేషన్‌ కూడా ఉండదని క్రికెట్‌ దక్షిణాఫ్రికా బోర్డు షుయబ్‌ మంజ్రా చెప్పాడు. మూడు మ్యాచ్‌ల టెస్టు సిరీస్‌లో భాగంగా మొదటి టెస్టు ఈ నెల 26న ఆరంభం కానుంది. జనవరి 19, 21, 23వ తేదీల్లో వన్డే మ్యాచ్‌లు ఉంటాయి. ఒప్పందం ప్రకారం దక్షిణాఫ్రికాలో కరోనా తీవ్రత పెరిగితే సిరీస్‌ నుంచి వైదొలిగే వీలు భారత్‌కు ఉన్నా... ప్రస్తుతానికి బీసీసీఐకి పర్యటన నుంచి తప్పుకునే ఉద్దేశం లేదని ఓ బోర్డు అధికారి చెప్పాడు. సీఏస్‌ఏ ఏర్పాటు చేసిన బయో బబుల్‌పై బోర్డు సంతృప్తిగా ఉన్నట్లు తెలిపాడు. సిరీస్‌ సందర్భంగా రెండు జట్ల ఆటగాళ్లకు రోజూ ర్యాపిడ్‌ టెస్టులు నిర్వహిస్తారు. పాజిటివ్‌ వచ్చిన వారిని ఐసోలేషన్‌లో ఉంచి వైద్యం చేస్తారు.