Virat Kohli: వందలో ‘100’ కొట్టిన వీరులు వీరే.. అందులో కోహ్లీ చేరతాడా?

విరాట్‌ ముందు అరుదైన అవకాశం..

‘వంద టెస్టులు ఆడటం.. వందో మ్యాచ్‌లో వంద పరుగులు చేయడం’... మాటల్లో చెప్పలేని అనుభూతి ఇది. ఇప్పటివరకు వందల మంది అంతర్జాతీయ క్రికెట్‌ ఆడినా.. కేవలం 70 మంది మాత్రమే వంద టెస్టుల మైలురాయిని దాటారు. అందులో 9 మంది మాత్రమే అరుదైన వందలో ‘100’ ఘనతను సాధించారు. టీమ్‌ఇండియా మాజీ సారథి విరాట్‌ కోహ్లీ సైతం ఆ అరుదైన రికార్డు ముంగిట ఉన్నాడు. ఇప్పటివరకు 99 టెస్టులు ఆడిన విరాట్‌... 27 శతకాలు సాధించాడు. శుక్రవారం నుంచి శ్రీలంకతో ఆడే టెస్టు విరాట్‌కి వందోది. అందులో శతకం సాధిస్తే అరుదైన వందలో ‘100’ జాబితాలో చేరనున్న తొలి భారత క్రికెటర్‌గా నిలువనున్నాడు. ఈ నేపథ్యంలో ఇప్పటివరకు వందో టెస్టులో వంద పరుగులు సాధించిన క్రీడాకారులు ఎవరో ఓ సారి తెలుసుకుందాం.

1️⃣ ఇంగ్లాండ్‌ మాజీ బ్యాట్స్‌మన్‌ కొలిన్‌ కౌడ్రే 1968లో తన వందో టెస్టులో శతకం బాదాడు. ఆస్ట్రేలియాతో ఆడిన ఆ మ్యాచ్‌లో అతడు 104 పరుగులు చేసి ఈ అరుదైన రికార్డు నమోదు చేసిన తొలి ఆటగాడిగా రికార్డులకెక్కాడు. అలాగే వంద టెస్టులు ఆడిన తొలి ఆటగాడు కూడా అతడే కావడం విశేషం.

2️⃣ పాకిస్థాన్‌ బ్యాటింగ్‌ దిగ్గజం జావెద్‌ మియాందాద్‌ ఈ ఘనత సాధించిన రెండో ఆటగాడిగా నిలిచాడు. అతడు 1989లో టీమ్‌ఇండియాపై 145 పరుగులు సాధించి ఈ రికార్డు నెలకొల్పాడు. అయితే, జావెద్‌ తన అరంగేట్రం టెస్టులోనూ శతకం సాధించడం మరో విశేషం. ఇలా తొలి టెస్టు, వందో టెస్టులో సెంచరీ కొట్టిన తొలి ఆటగాడిగా నిలిచాడు.

3️⃣ వెస్టిండీస్‌ ఆటగాడు గార్డన్‌ గ్రీనిడ్జ్‌ సైతం అరంగేట్రంతో పాటు వందో టెస్టులోనూ శతకం బాదిన ఆటగాడిగా నిలిచాడు. అతడు 1990లో ఇంగ్లాండ్‌పై 149 పరుగులు సాధించి ఈ రికార్డు నమోదు చేశాడు. అలాగే గ్రీనిడ్జ్‌ తన వందో వన్డేలోనూ శతకం బాదాడు. ఇలా టెస్టుల్లో, వన్డేల్లో వందో మ్యాచ్‌లో సెంచరీ కొట్టిన ఏకైక ఆటగాడిగా ఇప్పటికీ కొనసాగుతున్నాడు.

4️⃣ ఇంగ్లాండ్‌ మాజీ బ్యాట్స్‌మన్‌ అలెస్‌ స్టీవార్ట్‌ 2000 సంవత్సరంలో వెస్టిండీస్‌పై తన వందో టెస్టులో 105 పరుగులు సాధించి.. ఈ ఘనత సాధించిన నాలుగో ఆటగాడిగా నిలిచాడు.

5️⃣ పాకిస్థాన్‌ మాజీ సారథి ఇంజమామ్‌ ఉల్‌ హక్‌ 2005లో టీమ్‌ఇండియాపై ఈ అరుదైన రికార్డు నెలకొల్పాడు. బెంగళూరు చిన్నస్వామి స్టేడియంలో జరిగిన ఆ మ్యాచ్‌లో ఇంజీ 184 పరుగులు సాధించాడు. దీంతో ఈ రికార్డు నెలకొల్పిన ఐదో ఆటగాడిగా చరిత్రకెక్కాడు.

6️⃣ ఆస్ట్రేలియా బ్యాటింగ్‌ దిగ్గజం, మాజీ కెప్టెన్‌ రికీ పాంటింగ్‌ ఈ జాబితాలో ఆరో క్రికెటర్‌గా నిలిచాడు. అతడు 2006లో దక్షిణాఫ్రికాపై తన వందో టెస్టులో (120, 143*) రెండు ఇన్నింగ్స్‌ల్లోనూ శతకం సాధించాడు. దీంతో ఇలా వందో టెస్టులో రెండు శతకాలు బాదిక ఏకైక క్రికెటర్‌గా కొత్త రికార్డు నమోదు చేశాడు.

7️⃣ దక్షిణాఫ్రికా మాజీ సారథి గ్రేమ్‌ స్మిత్‌ ఇంగ్లాండ్‌పై ఈ ఘనత సాధించాడు. 2012లో జరిగిన ఆ మ్యాచ్‌లో అతడు 131 పరుగులు చేసి వందో టెస్టులో శతకం బాదిన ఏడో క్రికెటర్‌గా నిలిచాడు.

8️⃣ దక్షిణాఫ్రికాకే చెందిన హషీమ్‌ ఆమ్లా ఈ జాబితాలో చేరిన ఎనిమిదో బ్యాట్స్‌మన్‌గా నిలిచాడు. అతడు 2017లో శ్రీలంకతో ఆడిన వందో టెస్టులో 134 పరుగులు చేశాడు.

9️⃣ ఇంగ్లాండ్‌ స్టార్‌ బ్యాట్స్‌మన్‌, టెస్టు కెప్టెన్‌ జో రూట్‌ గతేడాది టీమ్‌ఇండియాపై ఈ ఘనత సాధించాడు. దీంతో వందో టెస్టులో శతకం సాధించిన తొమ్మిదో క్రికెటర్‌గా నిలిచాడు. అయితే, అతడు ఆ ఒక్క ఇన్నింగ్స్‌లోనే 218 పరుగులు చేసి.. వందో టెస్టులో ద్విశతకం బాదిన తొలి క్రికెటర్‌గా, అత్యధిక స్కోర్‌ చేసిన ఆటగాడిగా నిలిచాడు.

విరాట్‌ చేస్తాడా...

విరాట్‌ ఈ అరుదైన ఫీట్‌ సాధించాలంటే చాలా కష్టపడాలి. ఎందుకంటే విరాట్‌ శతకం బాది రెండేళ్లకు పైనే అవుతోంది. ఇటీవలి కాలంలో కోహ్లీ అర్ధ శతకాలు సాధిస్తున్నా వాటిని శతకాలుగా మలచడానికి ఇబ్బందులు పడుతున్నాడు. కానీ, కోహ్లీ గతంలో కొన్ని కీలక సందర్భాల్లో అంచనాలకు మించి రాణించి విమర్శకుల ప్రశంసలు పొందాడు. ఇప్పుడూ అలాగే జరిగి తన వందో టెస్టులో వంద పరుగులు సాధిస్తే అటు అభిమానులకు, ఇటు కోహ్లీకి అంతకుమించిన ఆనందం మరొకటి ఉండదు. అది నిజమవ్వాలని మనమూ ఆశిద్దాం. ఆ అరుదైన జాబితాలో మన దేశం ఆటగాడి పేరు ఎక్కాలని కోరుకుందాం. ఆల్‌ ది బెస్ట్‌ విరాట్‌.

- ఇంటర్నెట్‌ డెస్క్‌ ప్రత్యేకం