స్టార్టప్‌-20 ఎక్స్‌ గ్రూపు ఏర్పాటు

ముగిసిన స్టార్టప్‌-20 ఆరంభ సమావేశాలు

ఈనాడు, హైదరాబాద్‌: స్టార్టప్‌లపై అనుభవాలు, ఉత్తమ విధానాలను చర్చించేందుకు స్టార్టప్‌-20 ఎక్స్‌ ప్రత్యేక గ్రూపును స్టార్టప్‌-20 అధ్యక్షుడు చింతన్‌ వైష్ణవ్‌ ప్రారంభించారు. కొత్తగా ఏర్పాటుచేసిన ఈ గ్రూపు.. స్టార్టప్‌-20కి అనుబంధంగా నాయకులు, పారిశ్రామికవేత్తలు, నూతన ఆవిష్కరణకర్తలు, విద్యావేత్తలు, ఇన్‌క్యుబేషన్‌ నిపుణులు, మహిళలు, యువత, కళాకారులు, ఉద్యమ నాయకులు తదితరులను ఒకే వేదిక మీదకు తెచ్చేలా పనిచేస్తుందని తెలిపారు. భారత్‌ సారథ్యంలో జరగనున్న జీ-20 సమావేశాల్లో భాగంగా స్టార్టప్‌-20 గ్రూపు రెండు రోజుల ఆరంభ సమావేశాలు ఆదివారం హైదరాబాద్‌లో ముగిశాయి. రెండోరోజు సమావేశంలో పేటీఎం వ్యవస్థాపకులు విజయ్‌శేఖర్‌ శర్మ, యువర్‌స్టోరీ సీఈవో శ్రద్ధాశర్మ, సినీనటుడు, స్టార్టప్‌ పెట్టుబడిదారు సునీల్‌శెట్టి పాల్గొని స్టార్టప్‌ ప్రయాణంలో అనుభవాలను పంచుకున్నారు. స్టార్టప్‌-20 ఎక్స్‌ గ్రూపు ఏర్పాటయ్యాక నిర్వహించిన రౌండ్‌టేబుల్‌ సమావేశాల్లో పాల్గొన్న అతిథులు తమ అనుభవాలను వివరించడంతో పాటు వాటిని ఆన్‌లైన్లో రికార్డు చేశారు. అనంతరం స్టార్టప్‌-20 పరిధిలో ఏర్పాటైన మూడు టాస్క్‌ఫోర్స్‌లకు జాతీయ, అంతర్జాతీయ ప్రతినిధులు నామినేషన్లు పూర్తిచేశారు. ఆపై వారు ట్యాంక్‌బండ్‌, గోల్కొండ కోటలను సందర్శించారు.