పీఎంజేఏవై లెక్కల్లో గందరగోళం

రెండు రకాల జవాబులిచ్చిన కేంద్ర మంత్రి

ఈనాడు, దిల్లీ: ఆయుష్మాన్‌ భారత్‌-ప్రధానమంత్రి జన్‌ ఆరోగ్య యోజన(ఏబీ-పీఎంజేఏవై) కింద తెలంగాణకు విడుదల చేసిన నిధులపై కేంద్ర ఆరోగ్యశాఖ సహాయ మంత్రి భారతి ప్రవీణ్‌ పవార్‌ భిన్నమైన సమాధానాలిచ్చారు. భాజపా రాజ్యసభ సభ్యుడు డాక్టర్‌ లక్ష్మణ్‌ ఏబీ-పీఎంజేఏవైపై రెండు ప్రశ్నలు వేర్వేరుగా అడిగారు. వాటికి కేంద్ర మంత్రి మంగళవారం వేర్వేరుగా లిఖితపూర్వక సమాధానాలిచ్చారు. ఒక ప్రశ్నకు తెలంగాణలో ఈ పథకం కింద 7,09,497 మంది ఆసుపత్రిలో చేరారని, వారి చికిత్సలకు అయ్యే మొత్తం వ్యయం రూ.1,984.53 కోట్లు అని, అందులో రూ.247.17 కోట్లు విడుదల చేశామని పేర్కొన్నారు. ఇదే అంశంపై అడిగిన మరో ప్రశ్నకు.. తెలంగాణలో ఈ పథకం కింద 7.09 లక్షల మంది ఆసుపత్రుల్లో చేరారని, వారి చికిత్సలకు అయ్యే మొత్తం వ్యయం రూ.2,012 కోట్లని, కేంద్ర ప్రభుత్వ వాటా కింద రూ.236.45 కోట్లు విడుదల చేశామని వెల్లడించారు. ఇలా మంత్రి గణాంకాల్లో తేడాలు చూపారు.