ప్రాణాలైనా ఇస్తాం కానీ భూములు ఇవ్వం

జాతీయ రహదారిపై రైతుల ధర్నా

దామెర, న్యూస్‌టుడే: హనుమకొండ జిల్లా దామెర మండలం ఊరుగొండలోని 163వ నంబర్‌ జాతీయ రహదారిపై గురువారం గ్రీన్‌ఫీల్డ్‌ నేషనల్‌ హైవే నిర్మాణంలో భూములు కోల్పోతున్న రైతులు ధర్నా చేశారు. ప్రాణాలైనా ఇస్తాం కానీ గ్రీన్‌ఫీల్డ్‌ జాతీయరహదారికి తమ భూములను ఇవ్వబోమని తేల్చి చెప్పారు. పురుగుమందు డబ్బాలు పట్టుకొని నిరసన వ్యక్తం చేశారు. రెండు గంటల పాటు ఈ ధర్నా కొనసాగడంతో కిలోమీటర్ల మేర వాహనాలు నిలిచిపోయాయి. ప్రధాని మోదీ, ఎన్‌హెచ్‌ఏఐకు వ్యతిరేకంగా నినాదాలు చేస్తూ దిష్టిబొమ్మను దహనం చేశారు. పోలీసులు రైతులను బలవంతంగా తరలించేందుకు ప్రయత్నించడంతో కొంతసేపు వాగ్వాదం జరిగింది. అనంతరం రైతులు ధర్నాను విరమించారు.