Ukraine: షాపింగ్‌మాల్‌పై రష్యా క్షిపణి దాడి.. పది మందికిపైగా మృతి

కీవ్‌: ఉక్రెయిన్‌లోని రద్దీగా ఉన్న షాపింగ్‌ మాల్‌పై రష్యా క్షిపణి దాడి చేసింది.  ఈ దాడి ఘటనలో సుమారు 10 మంది మరణించగా 40 మందికిపైగా గాయపడ్డారు. తూర్పు ఉక్రెయిన్‌ నగరమైన క్రెమెన్‌చుక్‌లో సోమవారం ఈ సంఘటన జరిగినట్లు అక్కడి అధికార ప్రతినిధి డిమిట్రో లునిన్‌ ధ్రువీకరించారు. ఆ ప్రాంతంలో సహాయక చర్యలు కొనసాగుతున్నట్లు తెలిపారు.  

అయితే, తాజా ఘటనపై ఉక్రెయిన్‌ అధ్యక్షుడు జెలెన్‌స్కీ స్పందించారు. ఈమేరకు ఆయన మెసేజింగ్‌ యాప్‌ టెలిగ్రామ్‌లో ఇలా రాసుకొచ్చారు. ‘‘రద్దీ షాపింగ్‌ మాల్‌పై రష్యా క్షిపణి దాడి చేసింది. ఆ సమయంలో సుమారు వెయ్యి మందికి పైగా మాల్‌లో ఉన్నారు. క్షిపణి దాడి వల్ల షాపింగ్‌ మాల్‌లో భారీగా మంటలు ఎగసిపడుతున్నాయి. ఈ సంఘటనలో ఎంత మంది గాయపడ్డారో లెక్కించడం కష్టంగా ఉంది’’ అని జెలెన్‌స్కీ వెల్లడించారు.