Imran khan: ఇమ్రాన్‌ సంచలన నిర్ణయం.. 33 ఎంపీ స్థానాల్లో ఒక్కడే పోటీ

లాహోర్‌: పాకిస్థాన్‌ మాజీ ప్రధాని, తెహ్రీక్‌-ఎ-ఇన్సాఫ్‌ (పీటీఐ) పార్టీ అధినేత ఇమ్రాన్‌ ఖాన్‌ సంచలన నిర్ణయం తీసుకున్నారు. జాతీయ అసెంబ్లీలో ఖాళీ అయిన 33 స్థానాలకు మార్చి 16న ఉప ఎన్నికలు జరగనుండగా, అన్ని చోట్లా ఆయనే పోటీ చేయనున్నారు. ఆదివారం జరిగిన పీటీఐ కోర్‌ కమిటీ సమావేశంలో ఈ మేరకు నిర్ణయించినట్లు పార్టీ ఉపాధ్యక్షుడు షా మహమూద్‌ ఖురేషీ వెల్లడించారు. ముందస్తు ఎన్నికల విషయంలో అధికార కూటమిపై మరింత ఒత్తిడి పెంచేందుకే ఈ నిర్ణయం తీసుకున్నట్లు పార్టీ వర్గాలు పేర్కొన్నాయి.

గతేడాది ఏప్రిల్‌లో జరిగిన విశ్వాస పరీక్షలో ఓటమితో ఇమ్రాన్‌ ప్రధాని పదవిని కోల్పోయిన సంగతి తెలిసిందే. ఇమ్రాన్‌ ఆదేశాల మేరకు నేషనల్‌ అసెంబ్లీలోని పీటీఐ సభ్యులందరూ రాజీనామా చేశారు. ఇప్పటివరకూ 70 మంది రాజీనామాలను స్పీకర్‌ ఆమోదించారు. ఖాళీ అయిన స్థానాలకు సంబంధించి తొలుత 33 చోట్ల ఉప ఎన్నిక నిర్వహించాలని ఎన్నికల సంఘం నిర్ణయించింది. వీటిలో అన్ని చోట్లా పీటీఐ నుంచి ఇమ్రాన్‌ పోటీ చేయనున్నారు.