Jaishankar: ఆస్ట్రేలియా ఉపప్రధానికి జైశంకర్‌ సర్‌ప్రైజ్‌ గిఫ్ట్‌..!

ఇంటర్నెట్‌డెస్క్‌: క్రికెట్‌ భారత్‌-ఆస్ట్రేలియా సంబంధాలపై కూడా సానుకూల ప్రభావం చూపుతోంది. ఇరు దేశాలకు క్రికెట్‌ జగత్తులో దిగ్గజ జట్లు ఉన్నాయి. ఇక రెండు చోట్ల క్రికెట్‌ అభిమానులకు కొదవే లేదు. తాజాగా భారత విదేశాంగ శాఖ మంత్రి ఎస్.జైశంకర్‌ ఆస్ట్రేలియా ఉపప్రధాని రిచర్డ్‌ మార్లెస్‌కు ఓ క్రికెట్‌ గిఫ్ట్‌ ఇచ్చారు. ఈ గిఫ్ట్‌ను చూసి మార్లెస్‌ కూడా ఆశ్చర్యపోయారు. ఆ విషయాన్ని ఆయన స్వయంగా ట్విటర్‌లో పంచుకొన్నారు. 

న్యూజిలాండ్‌ పర్యటన ముగించుకొన్న భారత విదేశాంగ మంత్రి ఎస్‌.జైశంకర్‌ నిన్న ఆస్ట్రేలియాకు చేరుకొన్నారు. ఆయన అక్కడ పలు సమావేశాల్లో పాల్గొని బిజీబిజీగా గడిపారు. ఈ క్రమంలో ఆయన ఆస్ట్రేలియా ఉపప్రధాని రిచర్డ్‌ మార్లెస్‌తో భేటీ అయ్యారు. ఈ సందర్భంగా భారత లెజెండ్‌ విరాట్‌ కోహ్లీ సంతకం చేసిన ఓ బ్యాట్‌ను రిచర్డ్‌కు బహూకరించారు. ఈ గిఫ్ట్‌తో రిచర్డ్‌ ఆశ్చర్యపోయారు. దీనిని ఆయన ట్విటర్లో షేర్‌ చేశారు. ‘‘డాక్టర్‌ జైశంకర్‌కు ఆతిథ్యమివ్వడం సంతోషంగా ఉంది. చాలా విషయాలు మమ్మల్ని కలిపి ఉంచుతాయి. వీటిల్లో క్రికెట్‌పై ప్రేమకూడా ఒకటి. ఈ రోజు ఆయన విరాట్‌ సంతకం చేసిన బ్యాట్‌ను ఇచ్చి ఆశ్చర్యానికి గురిచేశారు’’ అని పేర్కొన్నారు. అనంతరం ద్వైపాక్షిక అంశాలపై చర్చించారు. ప్రాంతీయ భద్రత, రక్షణ రంగ సహకారం, ఇండో-పసిఫిక్‌ ప్రాంతంలో పరిణామాలు వంటి అంశాలు వీరి మధ్య చర్చకు వచ్చాయి. రిచర్డ్‌ ఆస్ట్రేలియా రక్షణశాఖ మంత్రిగా కూడా వ్యవహరిస్తున్నారు.