టైప్‌ 1 మధుమేహం నివారణ దిశగా..

జీవనశైలిలో ముడిపడిన టైప్‌ 2 మధుమేహాన్ని నివారించుకోవచ్చు. దీని బారినపడ్డవారిలో ఇన్సులిన్‌ ఉత్పత్తి అవుతుంటుంది గానీ కణాలు దీనికి అంతగా స్పందించవు. ఫలితంగా గ్లూకోజు కణాల్లోకి చేరుకోదు. రక్తంలో గ్లూకోజు మోతాదులు పెరిగిపోతాయి. ఇక టైప్‌ 1 మధుమేహుల్లో ఇన్సులిన్‌ ఉత్పత్తి కాదు. వీరిలో రోగనిరోధక వ్యవస్థ పొరపాటున క్లోమగ్రంథి మీద దాడి చేసి (ఆటోఇమ్యూన్‌) ఇన్సులిన్‌ను ఉత్పత్తి చేసే ఐలెట్‌ కణాలను దెబ్బతీస్తుంది. ఈ రకం మధుమేహం చాలావరకు చిన్న వయసులోనే మొదలవుతుంటుంది. ప్రస్తుతానికి దీన్ని నివారించుకునే మార్గమేదీ లేదు. అయితే స్క్రిప్స్‌ రీసెర్చ్‌ సంస్థ అధ్యయనం ఈ విషయంలో కొత్త ఆశలు రేకెత్తిస్తోంది. రక్తంలోని టి కణాలను విశ్లేషించటం ద్వారా టైప్‌ 1 మధుమేహం ముప్పు గలవారిని గుర్తించే అవకాశముందని పరిశోధకులు గుర్తించటం విశేషం. తదుపరి అధ్యయనాల్లో ఇది ప్రామాణికమని తేలితే ఆటోఇమ్యూన్‌ ప్రక్రియను ఆపే చికిత్సకు సరిపోయిన వారిని గుర్తించటానికి దీన్ని వాడుకోవచ్చని, టైప్‌ 1 మధుమేహాన్ని నివారించదగినదిగా మార్చొచ్చని ఆశిస్తున్నారు. పరిశోధకులు ఈ రకం మధుమేహానికి కారణమయ్యే సీడీ4 టి కణాలను ఎలుకలు, మనుషుల రక్తం నుంచి సంగ్రహించి, విశ్లేషించారు. దీని ద్వారా ఆటోఇమ్యూనిటీ ప్రక్రియ చురుకుగా ఉండటాన్ని, లేకపోవటాన్ని నూటికి నూరు శాతం వేరు చేయగలిగారు. టైప్‌ 1 మధుమేహం విషయంలో దీన్ని గొప్ప ముందడుగా భావిస్తున్నారు. ఎందుకంటే ఈ పరీక్షతో మధుమేహాన్ని నివారించుకోవటానికి లేదా చాలాకాలం ఆలస్యం చేయటానికి అవకాశం లభిస్తుందని అధ్యయనానికి నేతృత్వం వహించిన లుక్‌ టీటన్‌ చెబుతున్నారు. టైప్‌ 1 మధుమేహానికి కారణమయ్యే ఆటోఇమ్యూన్‌ ప్రక్రియ దీర్ఘకాలంగా సాగుతూ వస్తుంటుంది. ఇది చాలాసార్లు ఆగుతూ, కొనసాగుతూ వస్తుంది. అయితే ఇదెలా మొదలవుతుందనేది కచ్చితంగా తెలియదు. జన్యుపరమైన అంశాలు, తరచూ వైరల్‌ ఇన్‌ఫెక్షన్లు దాడి చేయటం దీనికి కారణం కావొచ్చని అనుకుంటున్నారు. టైప్‌ 1 మధుమేహం గలవారు జీవితాంతం ఇన్సులిన్‌ ఇంజెక్షన్లు తీసుకోవాల్సి ఉంటుంది. ఐలెట్‌ కణాలు దెబ్బతినకుండా రోగనిరోధక శక్తిని అణచివేసే చికిత్సకు గత సంవత్సరం అమెరికా ఎఫ్‌డీఏ అనుమతించింది. అయితే ఈ చికిత్స ఎవరికి ఉపయోగపడుతుందో గుర్తించటం అంత తేలిక కాదు. యాంటీ ఐలెట్‌ యాంటీబాడీల మోతాదులను గుర్తించటం ద్వారా ఇలాంటి వారిని ఎంచుకుంటున్నారు. కానీ ఆటోఇమ్యూన్‌ ప్రక్రియ పురోగతిని గుర్తించటానికి ఈ యాంటీబాడీ ప్రతిస్పందన అంత కచ్చితమైంది కాదు. ప్రాథమికంగా చూస్తే టైప్‌ 1 మధుమేహం టి కణాలతోనే ప్రేరేపితమవుతుంది. ఈ నేపథ్యంలో తాజా అధ్యయన ఫలితాలు ప్రాధాన్యం సంతరించుకుంటున్నాయి.