పైనో పట్నం... కిందో పట్నం మధ్యలో లిఫ్టు!

ఎలివేటర్‌ ఎక్కడుంటుంది? అదేం ప్రశ్న? ఎత్తయిన భవంతుల్లో కింది నుంచి పైకి వెళ్లడానికి అనేస్తారు వెంటనే...కానీ ఓ లిఫ్టు గురించి తెలిస్తే ఆశ్చర్యపోతారు... ఇంతకీ దాని ప్రత్యేకత ఏంటి? ఎక్కడుందది?

. 

బ్రెజిల్‌లోని లాసెర్డా ఎలివేటర్‌ భలే గమ్మత్తుగా ఉంటుంది. ఇది రెండంతస్తుల ఓ ఊరుకు వారధిగా ఉంటుంది. రెండంతస్తుల ఊరేంటీ? ఎలివేటర్‌ కలపడం ఏంటీ? అనుకుంటున్నారా? మరేం లేదు. ఇక్కడి సాల్వడార్‌ అనే పట్టణం సిదాజ్‌ బైక్సా, సిదాజ్‌ అల్టా అనే రెండు పట్టణాలుగా విడిపోయి ఉంటుంది. సముద్ర తీరంలో ఉన్న కింద పట్టణం నుంచి పై పట్టణం 279 అడుగుల ఎత్తులో ఉంటుంది. మరి పైన నుంచి కిందకు, కింద నుంచి పైకి రాకపోకలు ఎలా? అందుకే ఈ లిఫ్టు కట్టారు. 
* బ్రెజిల్‌లో మొట్టమొదటి ఎలివేటర్‌ ఇదేనట. దీన్ని ఎప్పుడో 1873లో నిర్మించారు. ఆ తర్వాత మార్పులు చేస్తూ హంగులు అద్దుతూ వచ్చారు. 

* ఇంచుమించు ఇరవై అంతస్తుల ఎత్తు ఉండే ఈ ఎలివేటర్‌ 30 సెకన్లలో దూసుకుపోతుంది. కాస్త సర్దుకుని నిల్చునే లోపే వేగంగా దింపేస్తుందన్నమాట. 
* సముద్ర తీరం.. పరిసరాల అందాలు చూడ్డానికి ఇక్కడికి ఎక్కడెక్కడి నుంచో పర్యటకులు వస్తుంటారు. రోజూ ఈ లిఫ్టులో 15 వేల మంది వరకు ఎక్కుతుంటారు.