మాచెర్‌ డిమెర్‌ బొర

పొరుగింటి పుల్లకూర: బెంగాలీ వంటకం

చేపలతో వేపుడు, ఇగురు, పులుసు చెయ్యడం అందరికీ తెలిసిందే. కానీ చేపల గుడ్లతోనూ ఒక వెరైటీ వంటకం చేయొచ్చు. అదే ఈ మాచెర్‌ డిమెర్‌ బొర. చేప గుడ్లతో చేసిన వడ అని దీనర్థం.   ఈ బెంగాలీ వంటకాన్ని సాయంత్రం పూట వేడివేడిగా తింటే ఆ రుచే వేరు. తయారీ కూడా సులువే.
కావాల్సిన పదార్థాలు:
చేప గుడ్లు(చెన)- కప్పు, సెనగపిండి- రెండు కప్పులు, ఉల్లిపాయముక్కలు- మూడుచెంచాలు, పచ్చిమిర్చి- నాలుగు, కొత్తిమీర- చిన్నకట్ట, గసగసాలు- 100 గ్రాములు, ఉప్పు- తగినంత, నూనె: తగినంత
తయారీ విధానం: ముందుగా కొత్తిమీర, పచ్చిమిర్చి, గసగసాలను మెత్తగా పేస్టులా చేసుకుని పక్కన ఉంచుకోవాలి. ఈ పేస్ట్‌, ఉల్లిపాయముక్కలు కలిపి సెనగపిండిలో వేసి కలపాలి. ఇప్పుడు చేప చెనలో తగినంత ఉప్పు కలిపి సెనగపిండి మిశ్రమంలో వేసి కొద్ది కొద్దిగా నీళ్లుపోస్తూ కాస్త గట్టిగా కలుపుకోవాలి. ఇలాచేస్తే చెన పిండిలో పూర్తిగా కలిసిపోతుంది. ఇప్పుడు ఈ మిశ్రమాన్ని చిన్నచిన్న వడల్లా వత్తుకుని నూనెలో వేయించి తీయాలి. ఒక్కసారికి నాలుగు వడల వరకూ వేయించుకోవచ్చు. వీటిని సాయంత్రం సమయాల్లో వేడివేడిగా తింటే భలే రుచిగా ఉంటాయి.