కురుల ఆరోగ్యానికి మెంతి

ఇతర ఆకుకూరలతో పోలిస్తే మెంతికూర కొంచెం తక్కువే వినియోగిస్తాం కదూ! నిజానికి ఇది చాలా శ్రేష్ఠమైంది. ఇందులో ఎ,సి,ఇ విటమిన్లు, కెరోటిన్‌, క్యాల్షియం, ఐరన్‌, సోడియం, కాపర్‌, మెగ్నీషియం, జింక్‌, పొటాషియం, సెలేనియం, మాంగనీస్‌, ప్రొటీన్లు విస్తారంగా ఉన్నాయి. రోగ నిరోధక శక్తి పెరుగుతుంది. కొలెస్ట్రాల్‌ నియంత్రణలో ఉంటుంది. ఇన్సులిన్‌ స్థాయి సమంగా ఉంటుంది. మధుమేహం అదుపులో ఉంటుంది. ఉబ్బసం, కడుపుబ్బరం తగ్గుతాయి. యాంటీఆక్సిడెంట్లు విస్తారంగా ఉన్నందున వ్యాధినిరోధకంగా పనిచేస్తుంది. ఇందులోని కె విటమిన్‌ దంతాలు, ఎముకలను ఆరోగ్యంగా, దృఢంగా ఉంచుతుంది. మెదడులోని న్యూరాన్లు నాశనం కావనీ, అల్జీమర్స్‌, క్యాన్సర్‌లను తగ్గించడంలోనూ తోడ్పడుతుందనీ ఇటీవలి అధ్యయనాలు తెలియజేస్తున్నాయి. చర్మం ఆరోగ్యంగా ఉంటుంది. జుట్టు రాలడం, చుండ్రు లాంటి సమస్యలు తలెత్తవు. కాలేయం, మూత్రపిండాలకు మంచిది. బాలింతలకు పాలు పడతాయి. మెంతికూరలోని పీచు జీర్ణప్రక్రియను మెరుగుపరిస్తే.. ఫోలిక్‌ యాసిడ్‌ గర్భిణీలకు మేలు చేస్తుంది. ఇది రక్తహీనత, గుండె జబ్బులు రాకుండా కాపాడుతుంది. తక్కువ కెలొరీలు ఉన్నందున ఊబకాయం రాదు, లావైపోతామన్న బెంగ అవసరం లేదు. ఇది కూరల్లోనే కాదు సలాడ్స్‌, సూప్స్‌లోనూ బాగుంటుంది. ఇన్ని ప్రయోజనాలున్న మెంతిని తరచూ తిని ఆరోగ్యంగా ఉందాం.