చైనా.. కాఫీకి ఫిదా

ఉదయం లేవగానే ఓ కప్పు కాఫీ తాగితే.. ఇక ఎక్కడ లేని ఉత్సాహం వచ్చేస్తుంది. పాలు రావడం ఆలస్యమై- కాఫీ కడుపులో పడలేదంటే.. ఏదో వెలితిగా ఉంటుంది. అంత ఇష్టమైన కాఫీని రోజులో రెండు మూడుసార్లయినా సేవిస్తాం. అసలా పేరు చెబితే చాలు ప్రాణం లేచొస్తుంది. కమ్మటి రుచీ, పరిమళం దాని సొంతం మరి. మనం మాత్రమే కాదండోయ్‌.. ప్రపంచవ్యాప్తంగా కాఫీ ప్రియులున్నారు. అందుకే స్టార్‌బక్స్‌లో కాఫీ ఎంత ఖరీదైనా తాగేస్తున్నారు. చైనీయులు కూడా కాఫీ దాసులే. చెప్పాలంటే.. మొదటి స్థానంలో ఉన్నారు. కేవలం పన్నెండు నెలల వ్యవధిలో కాఫీ దుకాణాల సంఖ్య 58 శాతానికి పెరిగిందని, ప్రస్తుతం చైనాలో దాదాపు 50 వేల ఖరీదైన కాఫీ షాప్స్‌ ఉన్నాయని ‘వరల్డ్‌ కాఫీ పోర్టల్‌’ తెలియజేసింది. ప్రఖ్యాత స్టార్‌బక్స్‌ సంస్థ గత సంవత్సరం కొత్తగా సుమారు వెయ్యి దాకా కాఫీ షాప్స్‌ తెరిచింది. అందులో అత్యధిక పెట్టుబడులు పెట్టింది చైనాలోనే. తమకు అతి పెద్ద మార్కెట్‌ చైనాయేనని స్టార్‌బక్స్‌ సంస్థ తెలియజేసింది.