Jackfruit: ఆవిరి పీల్చినా చాలు..!

చూపు చురుగ్గా: పనసపండులో ఎ విటమిన్‌తోపాటు... కెరోటినాయిడ్లు పెద్ద మొత్తంలో ఉంటాయి. ఇవి కంటిచుట్టూ ఉండే మ్యూకస్‌పొరని కాపాడి చూపు మందగించకుండా చూస్తాయి. వయసు పెరుగుతున్న కొద్దీ కంటిచూపు మందగించడం సహజమే అయినా ఆ మార్పుని నెమ్మదించేలా చేస్తుంది పనస.

అలసట వేధిస్తోందా?: రక్తహీనత ఉన్నవారు ఇట్టే అలసిపోతూ ఉంటారు. ఈ సమస్య నుంచి బయటపడటానికి పనస దివ్యౌషధం. దీనిలో విటమిన్‌ సి సమృద్ధిగా ఉంటుంది. దాంతో మన ఆహారంలోని ఇనుముని శరీరం తేలిగ్గా గ్రహిస్తుంది.

ఆస్థమాతో ఇబ్బందా: ఈ సమస్య ఉన్నవారిలో వ్యాధినిరోధక శక్తి తక్కువగా ఉన్నా, వాతావరణంలో కాలుష్యం ఉన్నా సమస్య మరింతగా ఇబ్బంది పెడుతుంది. అలాంటప్పుడు పనసని ఉడికించిన ఆవిరి మంచిదని అధ్యయనాలు చెబుతున్నాయి. కారణం ఆ ఆవిరిలోని బయో ఫ్లెవనాయిడ్లు ఉబ్బసం నుంచి విముక్తి కలిగిస్తాయి.

ఎముకలు విరగకుండా: ఓ వయసు వచ్చాక శరీరంలో కాల్షియం స్థాయిలు తగ్గుతూ ఉంటాయి. ఈ సమస్య మహిళల్లో మరీ ఎక్కువ. అదే కొనసాగితే ఎముకలు గుల్లబారి చిటికీమాటికీ విరిగిపోతుంటాయి. ఇలా జరగకుండా ఉండాలంటే తరచూ పనసని ఆహారంలో చేర్చుకోవాలి. ఎందుకంటే ఈ పండులో క్యాల్షియం స్థాయిలు ఎక్కువ. ఎముకని గుల్లబారకుండా చేసి దాని సాంద్రతని పెంచుతుంది.