నోరూరించే సొరకాయ రొట్టె

గుజరాతీల వంటకాలకు ఒక ప్రత్యేక రుచి, పరిమళం ఉంటాయి. వాళ్లు ఆరోగ్య సూత్రాలు పాటించడం కొంచెం ఎక్కువే. అందుకే వీలై నప్పుడల్లా మట్టి పాత్రల్లో వండటానికి ప్రయత్నిస్తారు. అన్నిటినీ మించి కారం తక్కువగా వాడతారు. కూరలూ, చిరుతిళ్లూ.. ఏవీ స్పైసీగా ఉండకపోగా కొంచెం తియ్యగానే ఉంటాయి. గుజరాత్‌లో  ఇష్టంగా తినే పదార్థాల్లో ‘హాండవో’ ఒకటి. ఇది సొరకాయతో చేసే రొట్టె. తమ తమ ఇష్టాన్ని బట్టి ఇతర దుంపలు, కూరగాయలు జతచేస్తారు. ఇంతకీ ఈ వంటకం ఎలా చేస్తారంటే.. బియ్యం, కందిపప్పు, శనగపప్పు, మినప్పప్పు, పెసర పప్పులను నానబెట్టి గ్రైండ్‌ చేయాలి. అందులో కాస్త పెరుగు, కొన్ని నీళ్లు పోసి ఇడ్లీ పిండిలా తయారు చేయాలి. సొరకాయ, క్యారెట్‌ల తరుగు, అల్లం, పచ్చిమిర్చి ముద్ద, పాలకూర, కొత్తిమీర, ఉప్పు, కారం, పంచదార, బేకింగ్‌ సోడా, నిమ్మరసం.. వీటన్నిటినీ పిండిలో కలిపి, అవెన్‌లో బేక్‌ చేసి.. తాలింపు వేస్తే ఘుమఘుమలాడే ‘హాండవో’ తయారైపోతుంది. వింటేనే నోరూరుతోందా! అయితే మీరూ చేసి చూడండి!