కర్ణుడు దుష్టుడెలా అయ్యాడు?

ఒకరోజు రాత్రివేళ అంపశయ్యపై ఉన్న భీష్మ పితామహుని చూడటానికి కర్ణుడు వచ్చాడు. కుశలసమాచారం అయ్యాక ‘మహాశయా! నాలో ఇంత వీరత్వం, దానగుణం ఉన్నప్పటికీ కొందరు నన్ను తక్కువచేసి చూస్తున్నారు. ఎందుకలా? నన్ను అర్జునుడితో సమానంగా ఎందుకు పరిగణించడం లేదు?’ అనడిగాడు. ఆ ప్రశ్నకు బదులిస్తూ భీష్మపితామహుడు-

జాతోసి ధర్మ లోపేన తతస్తే బుద్ధిరీదృశీ
నీచాశ్రయాన్మత్సరేణ ద్వేషిణీ గుణినామపి

నీ జననంలోనే ధర్మలోపం ఉంది. అందువల్లే నీకు ఇటువంటి బుద్ధి కలిగింది. ఎంతటి గుణ సంపన్నులైనా నీచ బుద్ధి కలవారిని ఆశ్రయిస్తే.. వారి మనసు కూడా ఈర్ష్య, ద్వేషాలతో నిండుతుంది. దుర్యోధనాదుల సాంగత్యం కారణంగానే లోకులు నిన్ను కూడా లోకువగా చూస్తున్నారు- అంటూ బదులిచ్చాడు. దారానికి పరిమళం ఉండదు. కానీ కుసుమాలను గుచ్చిన దారానికి సువాసన అబ్బుతుంది. అందువల్ల మనం దుష్టబుద్ధి ఉన్నవారితో కాకుండా సుగుణ సంపన్నుల సాన్నిధ్యంలో గడిపేందుకు ప్రయత్నించాలి. ధర్మానికి హాని కలిగే పనులు చేయకూడదు. అలాంటి వారితో చెలిమి కూడా తగదని గ్రహించాలి- అంటూ వివరించాడు.  

శివలెంక ప్రసాదరావు