ఇరవై నిమిషాలు ఇష్క్‌తో!

మనసు విప్పండి

మదిలోని ఆలోచనల్ని    విధిగా పంచుకోవాలి. నా వాళ్లేగా ఆ మాత్రం అర్థం చేసుకోలేరా అనుకోవద్దు. విడమరిచి చెప్పందే ఎవరికైనా ఏదీ అర్థం కాదు

కడదాకా మీకు మీరే!

జంటగానే జర్నీ ప్రారంభం అవుతుంది. మధ్యలో ఎవరొచ్చినా.. ఎలాంటి పాత్ర పోషించినా.. కడకు జంటగా మిగిలేదీ ఇద్దరే అన్న ప్రాధాన్యతని గుర్తించి సమయం కేటాయించుకోవాలి.

ఏం కావాలో అడగండి

నాకేం చేస్తున్నారు? అని ఆలోచించడం మాని.. ఎదుటివారికి ఏం కావాలో అడగండి. ఇంట్లో ఎప్పుడూ భార్యే ‘ఏం వండమంటావ్‌?’ అని అడుగుతుంది. ఓ పూట మీరు అడగండి. ‘ఏం వండమంటావ్‌?’ అని. మాటతో మీరు తనకి ఇచ్చే ప్రాధాన్యతకి భాగస్వామి ఫిదా అవుతుంది.

అనుమతి కోరండి

చాలా కాలంగా పరిచయం ఉందనో.. స్నేహితులమే కదా అనో.. అనుమతి లేకుండా సోషల్‌ మీడియాలోగానీ మరెక్కడైనా వారికి సంబంధించిన విషయాల్ని పంచుకోవద్దు.

మాటలు బాధిస్తాయ్‌

కోపంలోనో... అపార్థం చేసుకునో.. జారిన మాటలు ఎంతగానో బాధిస్తాయ్‌. కనిపించని బలమైన గాయాలుగా మారతాయ్‌. అవి మానాయో లేదో తెలుసుకోవడమూ కష్టమే.

తిరిగి ఇవ్వాలి

మనం బిజీ. ఆఫీసు, అప్పుడే కొత్తగా వచ్చిన ఇల్లాలు... మరి మనల్ని ఇంతకాలం చూసుకున్న అమ్మానాన్నల పరిస్థితి ఏంటి? రోజూ తీరక లేకపోయినా వారానికి ఒకసారైనా వారితో గడపడానికి సమయం ఇవ్వండి. వారితో కూర్చొని కొద్దిసేపు మాట్లాడండి. వారికి ఇష్టమైన చోటుకి తీసుకెళ్లండి. ఇది మీ మానసిక ప్రశాంతతకు ఎంతో దోహదం చేస్తుంది.

ఓపిగ్గా వినాలి...

ఉద్దేశాలు ఏవైనప్పటికీ చెప్పేది వినడం అలవాటుగా మార్చుకోవాలి. వినే ప్రతిదానికి ఒప్పుకోవాల్సిన అవసరం లేదుకానీ... ప్రతీది వినాలి. అప్పుడే ఎదుటి వ్యక్తి ఎలాంటి మూలాల నుంచి మాట్లాడుతున్నాడో తెలుస్తుంది. దీంతో వారి స్థాయిని అర్థం చేసుకోవడం వీలవుతుంది.

మూడు పదాల్లో ఏదొకటి

సందర్భం ఏదైనా... ఎక్కడున్నా.. మదిలో కలిగిన భావాల్ని వెంటనే చెబుతుండాలి. ఆఫీస్‌కి హడావిడిగా రెడీ అవుతున్నప్పుడు భార్య లంచ్‌బాక్స్‌ చేతికి ఇస్తే లాక్కుని వెళ్లిపోకుండా... తీసుకుని చిరునవ్వుతో ‘లవ్‌ యూ’ చెప్పండి. తిన్నాక ‘వంటలు బాగున్నాయ్‌.. థ్యాంక్స్‌’ అని మెసేజ్‌ పెట్టండి. ఈ రోజు త్వరగా వస్తానని లేటుగా ఇంటికి వెళ్లినప్పుడు ‘సారి’ చెప్పేందుకు వెనకాడొద్దు. అర్థం చేసుకుంటుందిలే అని వదిలేయకండి.

వాట్సాప్‌ వేదికగా..

చదువు.. ఉద్యోగం.. నిమిత్తం దూర ప్రాంతాలకు వెళ్లాల్సివస్తుంది. అలాంటప్పుడు దూరం భారమైనా ఇరువురి బంధం బలంగా కొనసాగేందుకు మార్గాల్ని వెతకాలి. ఉదాహరణకు ఇంటి నుంచి దూరంగా వెళ్లి చదువుకుంటున్న వారికి ఫ్యామిలీ రిలేషన్‌షిప్‌ని మిస్‌ అవ్వకుండా ఓ వాట్సాప్‌ గ్రూపుని క్రియేట్‌ చేయొచ్చు. ఎవరు ఎక్కడున్నా ఒకరినొకరు ప్రోత్సహించుకునేలా.. ఉత్సాహపరుచుకునేలా గ్రూపులో ప్రేమని పంచుకోవాలి. వీడియో కాల్‌్్స ఎలాగూ ఉన్నాయి కదా!

‘గ్రాంటెడ్‌’ అనుకోవద్దు

లవరు, స్నేహితుడు, భార్య, భర్త, అమ్మానాన్నలు... ఇలా ఎవరితోనైనా ముడిపడిన బంధం మీకేదో అధికారికంగా మంజూరైందిగా (గ్రాంట్‌) అనుకుంటే బంధాలు మోయలేనంత భారంగా మారతాయని మానసిక శాస్త్ర నిపుణులు హెచ్చరిస్తున్నారు. బంధాల్ని మరింత బలంగా మార్చుకునేందుకు రోజూ విధిగా కొంత సమయం కేటాయించడం అనివార్యమని సూచిస్తున్నారు. ఎంత బిజీగా ఉన్నప్పటికీ ఓ 20 నిమిషాలు... ఫోన్‌, ఫైల్స్‌, సోషల్‌ మీడియా.. ఇలా అన్నీ పక్కన పెట్టేసి కలిసి మాట్లాడుకోవాలి. ఇరువురికీ ఆసక్తికరమైన టాపిక్‌.. కలిసి చేసే పని.. లేదంటే నడక.. ఇలా ఏదైనా ఒకరికొకరు అనుకునేలా కలిసి సమయాన్ని గడపాలి.

వాస్తవికతతోనే.. 
చాలా మంది ప్రేమ, స్నేహం సహజంగా పుడతాయని, ఏం చేయకపోయినా అవి ఎల్లప్పుడూ అలానే ఉంటాయని నమ్ముతారు. అది వాస్తవ దృక్పథం కాదు. నిజజీవితంలో బంధాల్ని కాపాడుకునేందుకు ఎంతో స్పృహ కావాలి. రోజూ విధిగా కొంత సమయాన్ని వెచ్చించడం.. ఎదుటివారి మనసు లోతుల్లోకి తొంగి చూడడం చేస్తుండాలి. అంతేకాదు.. మీ లోతెంతో మీకూ తెలియాలి. ఇతరుల మనసును తెలుసుకోవాలనుకునే ముందు మీ గురించి మీరు తెలుసుకునే ప్రయత్నం తప్పక చేయాలి. ‘ఎందుకిలా చేస్తారో? ఏదనిపిస్తే అది మాట్లాడేస్తారు’ అని గోడకి తలబాదుకోవడాలు.. చేతిలో ఉన్నవి విసిరేయడాలు మానుకోవాలి. ఇలాంటి చేష్టలు దూరాన్ని పెంచుతాయి తప్పితే దగ్గర చేయవు. మీ ప్రతి స్పందనలపై మీరెప్పుడైతే అవగాహనకి వస్తారో.. అప్పుడు ఇతరుల స్పందనలకి విలువిస్తారు. ఎదుటి వ్యక్తి ఆలోచనల్ని అర్థం చేసుకునే ప్రయత్నం చేస్తారు. ఈ మొత్తం ప్రక్రియే ‘రిలేషన్‌షిప్‌ వర్క్‌అవుట్స్‌’ అన్నమాట. వీటిని ఎప్పుడైతే స్పృహతో ఫాలో అవుతారో అప్పుడు అపార్థాలకు తావుండదు. ‘నన్ను అర్థం చేసుకోవెందుని’ ప్రేమికుల్లో... ‘నా మాటకు విలువ ఇవ్వరెందుని’ టీనేజర్లు.. చేసే ఫిర్యాదులుండవు.

ఇరువురికీ ఇష్టంగా.. 
అభిప్రాయభేదాల్ని ఇరువురూ అంగీకరించాలి. ఒకరు లేజీ అయితే.. ఇంకొరు ఫిట్‌నెస్‌ఫ్రీక్‌ అయ్యుండొచ్చు... ఒకరికి పెంపుడు జంతువులు ఇష్టమైతే.. ఇంకొకరు వాటిని దగ్గరికి రానివ్వకపోవచ్చు.. అవన్నీ అంగీకరించాలి. ఒకరి అభిరుచులు, అభిప్రాయాల్ని మరొకరు గౌరవించుకోవాలి. విషయం ఏదైనా ఇతరుల దృక్కోణం నుంచి చూసే అలవాటు చేసుకోవడం చాలా ముఖ్యం. అంతేకాదు.. ఒకరి ప్రైవసీని మరొకరు అర్థం చేసుకోవాలి. అలాగే, ఇద్దరికీ కామన్‌గా ఉన్న ఆసక్తులు ఏంటో తెలుసుకోవాలి. ఉదాహరణకు ఇద్దరికీ గార్డెనింగ్‌ ఇష్టమైతే కలసి రోజూ కొంత సమయం తోటపని చేయొచ్చు. పుస్తక ప్రియులైతే చదివిన పుస్తకాల గురించి చర్చించొచ్చు. ఇద్దరూ కలసి కలిసి వంట చేస్తే ఆ అనుభూతిలో ఉండే మజానే వేరు!