కోడూరు-మేదరమెట్ల గ్రీన్‌ఫీల్డ్‌ హైవేలో నాలుగు ప్యాకేజీల బిడ్లు ఖరారు

ఈనాడు,అమరావతి: శ్రీసత్యసాయి జిల్లాలోని కోడూరు నుంచి ప్రకాశం జిల్లా మేదరమెట్ల వరకు నిర్మించనున్న ఆరు/నాలుగు వరుసల యాక్సెస్‌ కంట్రోల్‌ గ్రీన్‌ఫీల్డ్‌ హైవేలో నాలుగు ప్యాకేజీల టెండర్లను భారత జాతీయరహదారుల ప్రాధికార సంస్థ (ఎన్‌హెచ్‌ఏఐ) ఖరారు చేసింది. వీటిలో చెరో రెండింటిని దిలీప్‌ బిల్డ్‌కాన్‌, రాజ్‌పత్‌ ఇన్‌ఫ్రా సంస్థలు దక్కించుకున్నాయి.

* ప్యాకేజీ-1 చిలమత్తూరు మండలం కోడూరు నుంచి గోరంట్ల మండలం వనవోలు వరకు 24.3 కి.మీ.కు అంచనా విలువ రూ.594.10 కోట్లుకాగా, అంతకంటే 0.9 శాతం అధికంగా కోట్‌చేసి దిలీప్‌ బిల్డ్‌కాన్‌ బిడ్‌ దక్కించుకుంది.

* ప్యాకేజీ-2 వనవోలు నుంచి నల్లమాడ మండలం వంకరకుంట వరకు 21.4 కి.మీ.కు అంచనా రూ.479.68 కోట్లుకాగా, 3.84 శాతం తక్కువకు కోట్‌చేసి రాజ్‌పత్‌ ఇన్‌ఫ్రా సొంతం చేసుకుంది.

* ప్యాకేజీ-3 వంకరకుంట నుంచి తలుపుల మండలం ఓదులపల్లి వరకు 26.3 కి.మీ.కు రూ.675.15 కోట్ల అంచనా విలువతో టెండరు పిలవగా, రాజ్‌పత్‌ ఇన్‌ఫ్రా 3.26 శాతం అదనంగా కోట్‌చేసి టెండరు దక్కించుకుంది.

* ప్యాకేజీ-4 ఓదులపల్లి నుంచి వైఎస్‌ఆర్‌ జిల్లా వేముల మండలం నల్లచెరువుపల్లి వరకు 24.3 కి.మీ.కు రూ.740 కోట్ల అంచనా విలువతో టెండరు పిలవగా, దిలీప్‌ బిల్డ్‌కాన్‌ సంస్థ 4.6 శాతం ఎక్కువకు కోట్‌చేసి బిడ్‌ను సొంతం చేసుకుంది.