తాడేపల్లిలో డ్రగ్స్‌ కలకలం

సీఎం నివాసానికి కిలోమీటరు దూరంలో స్వాధీనం

తాడేపల్లి, న్యూస్‌టుడే: గుంటూరు జిల్లా తాడేపల్లిలో సీఎం నివాసానికి కిలోమీటరు దూరంలోనే డ్రగ్స్‌ పట్టుపడటం కలకలం రేపింది. ముందస్తు సమచారం మేరకు మంగళగిరి సెబ్‌ అధికారులు ముగ్గురు యువకులను అదుపులోకి తీసుకొని, వారి నుంచి రూ.5.28 లక్షల విలువైన 88 గ్రాముల మిథాంఫిటమిన్‌ (మెథ్‌)ను స్వాధీనం చేసుకున్నారు. మంగళగిరిలో శనివారం సెబ్‌ సూపరింటెండెంట్‌ రంగారెడ్డి, అసిస్టెంట్‌ సూపరింటెండెంట్‌ కృష్ణకిషోర్‌రెడ్డిలు విలేకరులకు వివరాలు వెల్లడించారు. తాడేపల్లి పరిధి కుంచనపల్లి గ్రామానికి చెందిన రవికిరణ్‌ అలియాస్‌ కిట్టయ్య, రఘునందన సాంబమూర్తి, పశ్చిమగోదావరి జిల్లా భీమవరానికి చెందిన దేవీప్రసాద్‌ శశాంకవర్మలు కలసి బెంగళూరు నుంచి మిథాంఫిటమిన్‌ తీసుకొస్తుండగా ప్రాతూరు క్రాస్‌రోడ్డు వద్ద వారిని అదుపులోకి తీసుకున్నారు. వీరు బెంగళూరులో ఓ వ్యక్తి నుంచి ‘మెథ్‌’ను తక్కువ ధరకు కొనుగోలు చేసి విజయవాడ, గుంటూరుల్లో అధిక ధరలకు విక్రయిస్తున్నారు. ఈ కేసులో మరికొంతమంది అరెస్టు కావాల్సి ఉందని అధికారులు పేర్కొన్నారు.