Housing Sales: హైదరాబాద్‌లో 4 రెట్లు పెరిగిన ఇళ్ల అమ్మకాలు

 ఏడు నగరాల్లో 3 శాతం పెరిగిన ధరలు

దిల్లీ: దేశంలోని ఏడు ప్రధాన నగరాల్లో ఇళ్ల అమ్మకాలు రెండు రెట్లు పెరిగాయని స్థిరాస్తి సేవల సంస్థ అనరాక్‌ వెల్లడించింది. వడ్డీ రేట్లు తక్కువగా ఉండటం, ఐటీ/ఐటీ ఆధారిత రంగాల్లో నియామకాలు పెరగడంతో ఈ గిరాకీ సాధ్యం అయ్యిందని పేర్కొంది. దిల్లీ, ముంబయి, చెన్నై, కోలక్‌తా, బెంగళూరు, హైదరాబాద్, పుణె మార్కెట్లను ఈ సంస్థ విశ్లేషించింది. దేశ వ్యాప్తంగా జులై-సెప్టెంబరు మధ్య  62,800 యూనిట్లు అమ్ముడయ్యాయని పేర్కొంది. సగటు ధర చదరపు అడుగుకు రూ.5,600 నుంచి రూ.5,760కి పెరిగిందని తెలిపింది. హైదరాబాద్‌లో 2020 జులై-సెప్టెంబరులో 1,650 నివాస యూనిట్లు అమ్ముడవ్వగా.. ఈ ఏడాది ఇదే కాలంలో నాలుగు రెట్లు అధికంగా 6,735 యూనిట్లు కొనుగోలు చేశారని పేర్కొంది. ఈ మూడో త్రైమాసికంలో కొత్తగా ఏడు నగరాల్లో దాదాపు 64,560 యూనిట్లు ప్రారంభం అయ్యాయని వెల్లడించింది.