యువ బాక్సర్‌ ఆత్మహత్య 

నాగ్‌పూర్‌: మహారాష్ట్రలోని అకోలాలో యువ బాక్సర్‌ పవన్‌ రౌత్‌ ఆత్మహత్య చేసుకోవడం కలకలం రేపింది. అకోలాలో తన హాస్టల్‌ గదిలో శుక్రవారం ఉదయం రౌత్‌ ఉరి వేసుకొని బలవన్మరణానికి పాల్పడినట్టు  కోచ్‌ సతీశ్‌చంద్ర భట్‌ వెల్లడించారు. ఇటీవల దిల్లీలో జరిగిన జాతీయ స్థాయి బాక్సింగ్‌ ఛాంపియన్‌ పోటీల్లో పవన్‌ రౌత్‌ మహారాష్ట్ర తరఫున ప్రాతినిధ్యం వహించాడని ఆయన తెలిపారు.

నాగ్‌పూర్‌కు చెందిన 19 ఏళ్ల పవన్‌ రౌత్‌ అకోలాలోని స్పోర్ట్స్‌ అకాడమీలో శిక్షణలో ఉన్నాడు. అక్కడే హాస్టల్‌లో ఉంటున్నాడు. శుక్రవారం అకోలాలోనే జరిగే ఒక టోర్నమెంట్‌లో పాల్గొనాల్సి ఉన్న నేపథ్యంలో అతడు బలవన్మరణానికి పాల్పడటం విషాదం నింపింది. అయితే, శుక్రవారం అనారోగ్యంతో పవన్‌ రౌత్‌ శిక్షణకు రాలేదని కోచ్‌ తెలిపారు. ఈ రోజు తన గదిలో ఉరివేసుకొని మృతిచెందాడని వెల్లడించారు. ఈ ఘటనను మహారాష్ట్ర క్రీడా మంత్రి సునిల్‌‌ కేదార్‌ ధ్రువీకరించారు. ఆత్మహత్యకు గల కారణాలు ఇంకా తెలియరాలేదు.