Sexual Abuse: తండ్రి వేధింపుల నుంచి కాపాడతానని నమ్మించి.. బాలికపై సామూహిక అత్యాచారం!

జైపుర్: తల్లిలేని కుమార్తెను కళ్లలో పెట్టుకుని చూసుకోవాల్సిన కన్న తండ్రే.. ఆమె పట్ల లైంగిక వేధింపుల (Sexual Abuse)కు దిగాడు! ఇదే అదనుగా.. తండ్రి అఘాయిత్యాల నుంచి కాపాడతానంటూ ఓ వ్యక్తి ఆమెను నమ్మించి ఇంటి నుంచి బయటకు తీసుకొచ్చాడు. ఈ క్రమంలోనే తన స్నేహితుడితో కలిసి ఆమెపై పలుమార్లు అత్యాచారానికి పాల్పడ్డాడు. రాజస్థాన్‌ (Rajasthan)లో ఈ దారుణం వెలుగుచూసింది. బాలిక ఫిర్యాదు మేరకు కేసు నమోదు చేసుకున్న పోలీసులు ఆమె తండ్రితోపాటు ఆ ఇద్దరినీ అరెస్టు చేశారు.

పోలీసుల వివరాల ప్రకారం.. స్థానికంగా ఓ 13 ఏళ్ల బాలిక తన తండ్రి (68)తో కలిసి నివసిస్తోంది. ఆమె తల్లి అయిదేళ్ల క్రితమే చనిపోయింది. ఈ క్రమంలోనే జూన్‌ 22 నుంచి తన కుమార్తె కనిపించడం లేదంటూ అతను ఇటీవల పోలీసులకు ఫిర్యాదు చేశాడు. ఈ మేరకు కేసు నమోదు చేసుకున్న పోలీసులు ఆమె ఆచూకీ కనుగొన్నారు. విచారణలో భాగంగా ఈ విషయాలు బయటపడ్డాయి. తన తండ్రి ఏడాదిన్నర కాలంగా తనను లైంగికంగా వేధిస్తున్నాడని, ఎవరికైనా చెబితే చంపేస్తానని బెదిరిస్తున్నాడని తెలిపింది.

మరోవైపు.. అదే సమయంలో బాలికకు ఓ వ్యక్తి (29)తో పరిచయం ఏర్పడింది. తండ్రి వేధింపుల నుంచి రక్షిస్తాననే సాకుతో ఆమెను వెంట తీసుకెళ్లాడు. ఈ క్రమంలోనే తన స్నేహితుడితో కలిసి ఆమెపై పలుమార్లు సామూహిక అత్యాచారానికి పాల్పడ్డాడు. బాలిక వాంగ్మూలాల ఆధారంగా.. నిందితులపై పోక్సో చట్టంతోపాటు ఆయా సెక్షన్ల కింద కేసు నమోదు చేసినట్లు పోలీసులు తెలిపారు. ఈ కేసులో తండ్రితోపాటు మరో ఇద్దరినీ అరెస్టు చేసినట్లు వెల్లడించారు. ఈ కేసులో తదుపరి విచారణ సాగుతోందని చెప్పారు.