Crime news : తాను శివుడి అవతారమట.. తిరిగి బతికిస్తానని చెప్పి వృద్ధురాలిని గొడుగుతో కొట్టి చంపాడు!

జైపుర్ : రాజస్థాన్‌ (Rajasthan) రాష్ట్రంలోని ఉదయ్‌పుర్‌ పరిధిలో దారుణం చోటు చేసుకుంది. తనను తాను శివుడి అవతారంగా పేర్కొన్న ఓ 60 ఏళ్ల వ్యక్తి.. 85 ఏళ్ల వృద్ధురాలిపై గొడుగుతో దాడి చేసి హతమార్చాడు. పక్కనే ఇద్దరు మైనర్‌ బాలురు ఈ ఘటనను చూస్తూ ప్రేక్షకపాత్ర వహించారు. అందులో ఒకరు ఆ దాడి దృశ్యాలను చిత్రీకరించారు. మృతురాలిని తిరిగి బతికిస్తానని చెప్పి నిందితుడు ఈ హత్యకు పాల్పడినట్లు పోలీసులు తెలిపారు.  

శంషాబాద్‌ విమానాశ్రయంలో రూ.77 లక్షల విలువైన బంగారం స్వాధీనం

పోలీసులు తెలిపిన వివరాల ప్రకారం.. ప్రతాప్‌ సింగ్‌ అనే వ్యక్తి ఫూటుగా మద్యం తాగాడు. ఆ తరువాత అతడికి కల్కిబాయ్‌ గమేతి అనే వృద్ధురాలు కనిపించింది. మద్యం మత్తులో తనను తాను శివుడి అవతారంగా భావించిన ఆ వ్యక్తి ఆ మహిళను చంపి తిరిగి బతికించాలనుకున్నాడు. వృద్ధురాలి పక్కన కూర్చొని తాను శివుడి అనుచరుడినని చెప్పాడు. ‘నువ్వు మహారాణివి’ అంటూ వెంటనే ఆమె ఛాతీపై పిడిగుద్దులు కురిపించాడు. ఆ దెబ్బలకు తాళలేక వృద్ధురాలు నేలపై పడిపోయింది. వెంటనే ఆమె జుట్టు పట్టుకుని కొంతదూరం ఈడ్చుకుంటూ వెళ్లాడు. ఆ తరువాత గొడుగు తీసుకొని చితకబాదాడు. దాంతో వృద్ధురాలు మరణించింది. 

గోగుండా తహసీల్‌ పరిధిలో ఈ హత్య చోటు చేసుకుందని పోలీసులు తెలిపారు. ఇది ఆదివాసీలు ఎక్కువగా నివసించే కొండ ప్రాంతం. సమీపంలోని వారి ఇంటికి వృద్ధురాలు నడుచుకుంటూ వెళ్తుండగా నిందితుడు ఆమెకు తారసపడ్డాడని పోలీసులు చెప్పారు. ఈ హత్యను ఇద్దరు మైనర్లు వీడియో తీశారని, మరో వ్యక్తి ఘటన జరిగిన ప్రాంతంలో ఉన్నాడని ఉదయ్‌పూర్‌ ఎస్పీ భువన్‌ భూషణ్‌ వెల్లడించారు. చనిపోయిన మహిళ మంత్రగత్తె కావడంతోనే వృద్ధుడు హత్యకు పాల్పడ్డాడనే వదంతులను ఆయన తోసిపుచ్చారు. ఈ కేసులో మొత్తం నలుగురు అనుమానితులను అదుపులోకి తీసుకొని విచారిస్తున్నామని ఎస్పీ చెప్పారు.