Crime news: నిందితుడిని పట్టుకునేందుకు వెళ్తే.. పోలీసులపై గ్రామస్థుల రాళ్లదాడి!

జైపుర్‌: మేకల చోరీకి యత్నించిన ఓ నిందితుడిని పట్టుకునేందుకు వెళ్లిన పోలీసు బృందానికి ఊహించని అనుభవం ఎదురైంది. గ్రామస్థులంతా ఏకమై వారిపై రాళ్లదాడికి దిగడంతో.. తొమ్మిది మంది సిబ్బందికి గాయాలయ్యాయి. బాధితుల్లో ఏఎస్సై కూడా ఉన్నారు. రాజస్థాన్‌ (Rajastha)లో ఈ ఘటన చోటుచేసుకుంది.

పోలీసుల వివరాల ప్రకారం.. ఇక్కడి సాలుంబర్‌ జిల్లాలోని ఇంటాలీ గ్రామంలో ఐదుగురు వ్యక్తులు మేకల చోరీకి యత్నిస్తూ గ్రామస్థుల కంటపడ్డారు. వెంటనే అప్రమత్తమైన వారు నిందితులను వెంబడించారు. ఈ క్రమంలో నలుగురు తప్పించుకోగా.. ఒకడు దొరికిపోయాడు. అతడిని చితకబాది పంచాయతీ కార్యాలయంలో బంధించారు. విషయం తెలుసుకున్న పోలీసులు ఆ నిందితుడిని పట్టుకునేందుకు గ్రామానికి చేరుకున్నారు.

తల కోసుకుని.. దేవుడి కోసం ఆత్మ బలిదాన యత్నం..!

అయితే, నిందితుడిని కస్టడీలో తీసుకున్న వెంటనే.. గ్రామస్థులు పోలీసులపై రాళ్లు రువ్వడం ప్రారంభించారు. ఈ దాడిలో ఏఎస్సై సహా తొమ్మిది మంది సిబ్బందికి గాయాలయ్యాయి. వారి వాహనాలనూ ధ్వంసం చేశారు. గాయపడ్డ సిబ్బంది ప్రస్తుతం ఆస్పత్రిలో చికిత్స పొందుతున్నారని పోలీసులు తెలిపారు. రాళ్ల దాడిపై కేసు నమోదు చేసి, నిందితులను గుర్తించేందుకు యత్నిస్తున్నట్లు చెప్పారు.