AP NEWS: ప్రేమ వివాహం.. ఆ తరువాత ఏమైందంటే?

నాదెండ్ల: గుంటూరు జిల్లా నాదెండ్ల మండలం గణపవరంలో కులాంతర ప్రేమ పెళ్లి వివాదానికి దారితీసింది. గణపవరానికి చెందిన పొలిశెట్టి రవి, గుంటూరుకు చెందిన ఓ యువతి ఐదేళ్లుగా ప్రేమించుకుంటున్నారు. అమ్మాయి సెలవులకు రవి ఇంటి దగ్గరలోని బంధువుల ఇంటికి వచ్చి వెళుతుండేది. ఈక్రమంలో వారి మధ్య ప్రేమ చిగురించింది. మేజర్లు కావడంతో వారం క్రితం పెద్దలకు తెలియకుండా వివాహం చేసుకున్నారు. ఆ తర్వాత నాదెండ్ల పోలీస్‌ స్టేషన్‌కు వెళ్లి రక్షణ కల్పించారని విజ్ఞప్తి చేశారు. దీంతో పోలీసులు ఇరు కుటుంబాలను పిలిచి సర్దిచెప్పి పంపించారు. ఈక్రమంలో ఇవాళ రవి ఇంటి వద్ద నోములు జరుపుకొంటుండగా.. అమ్మాయి తరఫు బంధువులు వచ్చి దాడి చేశారు. ఈ ఘటనలో ముగ్గురికి స్వల్ప గాయాలవగా, రవి ఇంటి అద్దాలు ధ్వంసమయ్యాయి. పోలీసులు అక్కడికి చేరుకుని గొడవను అదుపు చేశారు.