Crime News: దొంగలు పడ్డారని యువతి కేకలు.. నిజం తెలిసి షాకైన పోలీసులు

హైదరాబాద్‌: రంగారెడ్డి జిల్లా రాజేంద్రనగర్‌ ఎర్రబోడలోని ఓ ఇంట్లో జరిగిన చోరీ కేసును పోలీసులు చేధించారు. గురువారం ఉదయం 10గంటల సమయంలో దొంగలుపడ్డారని యువతి కేకలు వేసింది. ముసుగులు ధరించిన ఇద్దరు దుండగులు చొరబడి ఇంట్లో ఉన్న రూ.25వేలు అపహరించుకుపోయారని తెలిపింది. వారిని పట్టుకునేందుకు ప్రయత్నించగా తోసేసి పారిపోయారని నమ్మించే ప్రయత్నం చేసింది.

స్థానికుల సమాచారంతో ఘటనాస్థలికి చేరుకున్న రాజేంద్రనగర్‌ పోలీసులు.. క్లూస్‌ టీమ్‌ను రంగంలోకి దింపారు. సమీపంలో ఉన్న సీసీ కెమెరాలు పరిశీలించగా.. ఎక్కడా చోరీ జరిగిన ఆనవాళ్లు కనిపించలేదు. దీంతో యువతిని పోలీసులు గట్టిగా నిలదీయడంతో అసలు విషయం బయటపడింది. ఆమె చెప్పిందంతా కట్టుకథ అని తేలడంతో షాక్‌ అయ్యారు. ఇటీవల ఆన్‌లైన్‌ గేమ్స్‌ ఆడి రూ.25వేలు పోగొట్టుకుంది. ఆ నగదు స్నేహితుల వద్ద నుంచి తీసుకుంది. వారు...డబ్బులు తిరిగి ఇచ్చేయాలని అడగడంతో చోరీ డ్రామాకు తెరలేపినట్టు విచారణలో తేలింది. బీరువాలో దుస్తులు తానే చిందరవందరగా పడేసి గట్టిగా కేకలు వేసినట్టు అంగీకరించిందని పోలీసులు తెలిపారు.