ఆక్రమణల చెరలో వీఎంసీ స్థలం

డివిజన్‌ వైకాపా సమన్వయకర్త కన్ను

చుట్టుగుంట సిమెంట్‌ రోడ్డులో ప్రహరీ పక్కనే ఆక్రమణ

చుట్టుగుంట, న్యూస్‌టుడే : చుట్టుగుంట అల్లూరి సీతారామరాజు వంతెనకు వెళ్లే మార్గంలో బీఎస్‌ఎన్‌ఎల్‌ భవనం ప్రహరీ గోడకు ఆనుకొని నగరపాలక సంస్థకు చెందిన సుమారు 45 గజాల స్థలం ఉంది. దీని విలువ సుమారు రూ.60 లక్షలు ఉంటుంది. దీనిపై 26వ డివిజన్‌ వైకాపా సమన్వయకర్త కన్ను పడింది. ఎప్పటి నుంచో ఈ స్థలంపై కన్నేసిన ఆయన.. కరోనా సమయంలో దాన్ని సొంతం చేసుకునేందుకు యత్నించారు. తొలుత.. కొవిడ్‌ సమయంలో లైవ్‌ ఫిష్‌ తొట్టెలను పెట్టి అమ్మకాలు సాగించారు. ప్రస్తుతం రోడ్డు పక్కనే ఉన్న డ్రైనేజీపై శ్లాబు బిళ్లలు వేసి, ఆ స్థలంలో నిర్మాణానికి శ్రీకారం చుట్టారు. గత కొద్ది నెలలుగా టార్పాలిన్‌ పట్టాలతో కప్పి ఉంచి, భారీ కట్టడానికి తెరతీశారు. చుట్టుగుంట కూడలికి కూతవేటు దూరంలో ఉన్న ఈ స్థలం.. భారీగా ధర పలుకుతోంది. బీఎస్‌ఎన్‌ఎల్‌ భవనం ప్రాంగణం రోడ్డు పక్కనే నిరుపేదలు కూరగాయలు అమ్ముకునేందుకు అవకాశం కల్పించగా.. అక్కడా ఆయనకు చెందిన పలు దుకాణాలు ఉన్నాయని విమర్శలు ఉన్నాయి. దీనిపై అసిస్టెంట్‌ సిటీ ప్లానర్‌ బాలాజీని వివరణ కోరగా... ‘క్షేత్రస్థాయిలో సంబంధిత స్థలాన్ని పరిశీలించి, తగు చర్యలు తీసుకుంటానని చెప్పారు.’