ఖాతాదారుల ప్రమేయం లేకుండా నగదు మాయం

అనంత నేరవార్తలు, న్యూస్‌టుడే: సైబర్‌ నేరగాళ్లు ఎలా మోసం చేస్తారో తెలియక ప్రజలు బెంబేలెత్తుతున్నారు. తాజాగా నగర శివారులోని ఎ.నారాయణపురం గ్రామానికి చెందిన ఇద్దరు అన్నదమ్ములు తమ బ్యాంకు ఖాతాల్లో సొమ్మును పోగొట్టుకున్నారు. వివరాలు.. ఎ.నారాయణపురం గ్రామానికి చెందిన అన్నదమ్ములు లక్ష్మీనారాయణ, చలపతిలకు చెందిన రూ.లక్ష ఏడు వేలను సైబర్‌ నేరగాళ్లు దోచుకున్నారు. ఈ నెల 24న రాత్రి నుంచి ఖాతాల్లో డబ్బు డ్రా అవుతున్నట్లు వారి చరవాణులకు మెసేజ్‌లు వెళ్లాయి. పలు దఫాలుగా లక్ష్మీనారాయణకు చెందిన ఇండియన్‌ బ్యాంకు ఖాతా నుంచి రూ.70 వేలు, చలపతికి చెందిన కెనరా బ్యాంకు ఖాతాలో రూ.7 వేలు, అనంత ప్రగతి గ్రామీణ బ్యాంకు ఖాతాలో రూ.30 వేలు మాయమైంది. ఈ ఘటనతో ఆందోళన చెందిన బాధితులు ఆయా బ్యాంకుల్లో సంప్రదించారు. బ్యాంకు అధికారులతో సూచనతో బుధవారం సైబర్‌క్రైమ్‌కు ఫిర్యాదు చేశారు.