చిరు అభిమానుల భారీ ఆటో ర్యాలీ

ఆటో ర్యాలీని ప్రారంభిస్తున్న అభిమాని భవాని రవికుమార్‌

గుల్జార్‌పేట: గాడ్‌ ఫాదర్‌ చిత్రం ప్రీ రిలీజ్‌ ఈవెంట్‌ సందర్భంగా అనంతపురంలో మెగాస్టార్‌ చిరంజీవి అభిమానులు ఆయన ఫ్లెక్సీలతో భారీ ఆటో ర్యాలీ నిర్వహించారు. ఈ నెల 28న స్థానిక ఆర్ట్స్‌ కళాశాల మైదానంలో ప్రీ రిలీజ్‌ ఈవెంట్‌ జరగనుంది. ఇందులో భాగంగా సోమవారం 500 ఆటోలతో గాడ్‌ఫాదర్‌ చిత్ర పోస్టర్లను ఏర్పాటు చేసుకొని ప్రదర్శన చేపట్టారు. రాష్ట్ర చిరంజీవి యువత భవాని రవికుమార్‌ ఆర్ట్స్‌ కళాశాలలో విలేకరులతో మాట్లాడారు. 20 వేల మందికి ఉచితంగా పాసులు ఇవ్వడానికి సిద్ధం చేశామని తెలిపారు. దేశంలోనే తొలిసారిగా డీ అండ్‌ బీ సౌండ్‌ సిస్టమ్‌ను ఈ ఈవెంట్‌కు ఉపయోగిస్తున్నామని పేర్కొన్నారు. కార్యక్రమంలో అభిమానులు చలపతి, చంద్రమౌళి, శ్రీనివాసులు, షామీర్‌, హుసేన్‌ తదితరులు పాల్గొన్నారు.