లోక్‌ అదాలత్‌ను విజయవంతం చేయాలి

అనంతపురం (మూడోరోడ్డు): జాతీయ లోక్‌ అదాలత్‌ను విజయవంతం చేయాలని డీఎల్‌ఎస్‌ఏ ఛైర్మన్‌, జిల్లా ప్రధాన న్యాయమూర్తి జి.శ్రీనివాస్‌, డీఎల్‌ఎస్‌ఏ కార్యదర్శి, సీనియర్‌ సివిల్‌ జడ్జి గరికపాటి దీనబాబులు సయుక్త ప్రకటనలో కోరారు. ఉమ్మడి అనంత జిల్లాలోని వివిధ కోర్టుల్లో మే 13న (రెండో శనివారం) నిర్వహించే అదాలత్‌లో కక్షిదారులు తమ కేసులను పరిష్కరించుకోవచ్చని పేర్కొన్నారు. పెండింగ్‌లో ఉన్న సివిల్‌ తగాదాలతో పాటు ప్రమాదభరిత కేసులు, చెక్‌బౌన్సు, కుటుంబ తగాదాలు, పారిశ్రామిక వివాదాలు, రాజీ చేయదగ్గ క్రిమినల్‌, పన్నుల కేసులను పరిష్కరించుకోవచ్చని తెలిపారు. కక్షిదారులు కోర్టుల చుట్టూ తిరుగుతూ వ్యయప్రయాసలు పడకుండా లోక్‌ అదాలత్‌లో సులభంగా, సత్వర న్యాయం పొందటానికి వీలవుతుందని వివరించారు.