అనంత నగరపాలక కార్యాలయంలో సినిమా చిత్రీకరణ

అనంత నగరపాలక, న్యూస్‌టుడే: అనంత నగరపాలక కార్యాలయ ఆవరణలో సినిమా చిత్రీకరణపై విమర్శలు వస్తున్నాయి. బుధవారం సాయంత్రం నగరపాలక కార్యాలయంలో సెట్టింగ్‌లతో సినిమా తీశారు. ఆవరణలోనే సెట్టింగ్‌లు వేశారు. ఎన్నికల సమయంలో ప్రభుత్వ కార్యాలయంలో సినిమా తీయడంపై పలు అనుమానాలకు తావిస్తోంది. ఏ సినిమా అన్నది గోప్యంగా ఉంచారు. తమిళ సినిమాకు సంబంధించిన అనువాద సినిమా అని చెబుతున్నారు.

ఎమ్మార్వో కార్యాలయానికి సంబంధించిన దస్త్రాలపై చిత్రీకరణ సాగుతోంది. కార్యాలయంలో కూడా కొన్ని అంశాలు చిత్రీకరణ చేశారు. గత కమిషనర్‌ భాగ్యలక్ష్మి హయాంలో చిత్రీకరణ చేయాలని నిర్ణయించి అప్పట్లో అధికార పార్టీ నేతలతో ఒత్తిడి చేయించారు. ఆమె అందుకు అంగీకరించలేదు. తాజాగా ఎలా అనుమతి ఇచ్చారన్న ప్రశ్న తలెత్తుతోంది. నగరపాలక కమిషనర్‌ మేఘస్వరూప్‌ను వివరణ కోరగా ఎన్నికల కోడ్‌కంటే ముందుగానే అనుమతి తీసుకున్నారని, తాజాగా సినిమా చిత్రీకరణ చేస్తున్నారన్నారు. నగరపాలక వాహనాలు వాడుకోకూడదని, వాడుకొని ఉంటే చర్యలు తీసుకుంటామని వివరించారు.