కొండను తవ్వి.. వంకలు పూడ్చి

వైకాపా నాయకుల అండతో నిబంధనల అతిక్రమణ

కొండను కొల్లగొట్టారు ఇలా...

కనగానపల్లి, న్యూస్‌టుడే: వైకాపా నాయకుల అండతో కొందరు కొండలను మాయం చేస్తున్నారు. మట్టిని ఇష్టానుసారంగా తవ్వి ఆక్రమణలకు తెగబడుతున్నారు. కనగానపల్లి మండలం దాదులూరు రెవెన్యూ పంచాయతీలో ఉన్న కుర్లపల్లి గ్రామ సమీపంలో ఓ రియల్టర్‌ (భూ వ్యాపారస్థుడు) కొన్నేళ్ల క్రితం భూముల్ని కొనుగోలు చేశాడు. కొన్న భూముల్లో వంకలు, గుట్టలు ఉన్నాయి. ఆ పొలానికి ఆనుకొని కొండలో ఉన్న మట్టిని తవ్వి వంకలను పూడ్చుకోవచ్చని భావించి 148 ఎకరాల్లో ఉన్న కడుపునొప్పి కొండపై కన్నేశాడు. యంత్రాలతో మట్టిని తవ్వి ట్రాక్టర్లతో తరలించి వంకలను, వాగులకు మట్టితో కప్పేశాడు. కొండ ప్రాంతం సర్వే నంబరు 31లో 54.25 ఎకరాలు, 32లో 15.19 ఎకరాలు, 33లో 75.33 ఎకరాలు, 34లో 3.99 ఎకరాల విస్తీర్ణంలో ఉంది. ఇందులో 15 ఎకరాలకు పైగానే మండలంలోని ముఖ్య వైకాపా నాయకుల అండతో కొండను తవ్వేశాడు. వంకలు, వాగులను పూడ్చి పొలానికి సమాంతరంగా ఉండేలా నేలను తయారు చేశాడు. కొండపై కురిసిన వర్షపు నీరు వంకల వెంబడి చెరువుల్లోకి నీరు వెళ్లేందుకు ఆస్కారం లేకుండా చేశారు.