న్యాయం చేయాలని పోలీసులకు ఫిర్యాదు

బైరెడ్డిపల్లె, న్యూస్‌టుడే: చిట్‌ సంస్థ ఏజెంటునని చెప్పి ఓ మహిళ తన వద్ద డబ్బులు కట్టించుకుని మోసం చేసినట్లు బైరెడ్డిపల్లెకు చెందిన రమణప్ప మంగళవారం స్థానిక పోలీసులకు ఫిర్యాదు చేసినట్లు తెలిపారు. కొత్తయిండ్లు గ్రామంలో అంగన్‌వాడీ కార్యకర్తగా పనిచేస్తున్న తిప్పక్క ఓ చిట్‌ సంస్థలో ప్రతి నెల రూ.1,000 పెట్టుబడి పెడితే 25 నెలల తర్వాత రూ.50,000 నగదు గానీ, ఓ గేదె ఇస్తామని చెప్పి తన భార్య నాగరత్నమ్మ పేరు మీద డబ్బు కట్టించుకుందన్నారు. 25 నెలలు క్రమం తప్పకుండా రూ.1000 చొప్పున 25,000 చెల్లించినట్లు చెప్పారు. నిర్ణీత గడువు ముగిసి ఏడాదిన్నర కావొస్తున్నా ఎలాంటి నగదు గానీ, గేదె ఇవ్వలేదని వాపోయారు. ఈ విషయమై మంగళవారం ఆమెను ప్రశ్నిస్తే తన భార్యపై దాడి చేసిందన్నారు. చిట్‌ సంస్థలో చెల్లించిన డబ్బు తిరిగి ఇప్పించి న్యాయం చేయాలని బాధితుడు పోలీసులకు మొరపెట్టుకున్నాడు.