కుప్పంలో వైకాపా నాయకులకు షోకాజ్‌ నోటీసులు

చిత్తూరు కలెక్టరేట్‌: కుప్పంలో ఎన్నికల నిబంధనలు ఉల్లంఘించిన వైకాపా నాయకులకు.. ఆ నియోజకవర్గ రిటర్నింగ్‌ అధికారి షోకాజ్‌ నోటీసులు జారీచేశారు. సీఎం జగన్‌పై విజయవాడలో రాయితో దాడి చేశారని పేర్కొంటూ ఆదివారం కుప్పం పట్టణంలోని అంబేడ్కర్‌ విగ్రహం ఎదుట చేపట్టిన నిరసనలో.. డౌన్‌డౌన్‌ చంద్రబాబు అంటూ వైకాపా నాయకులు నినాదాలు చేసి ప్లకార్డులు ప్రదర్శించారు. ఎన్నికల ప్రవర్తనా నియమావళి అమల్లో ఉన్న సమయంలో నిరసనలు, ఆందోళనలు, ధర్నాలు చేపట్టాలంటే ముందుగా అధికారుల నుంచి అనుమతి తీసుకోవాలనే నిబంధన ఉంది. ఈ నిబంధనల్ని వైకాపా నాయకులు ఏ మాత్రం పట్టించుకోలేదు. ఈ ఘటనపై ‘ఈనాడు’లో ప్రచురితమైన కథనంపై అధికారులు స్పందించి వైకాపా నాయకులకు షోకాజ్‌ నోటీసులు జారీచేశారు.