విద్యార్థి మృతిపై ఆందోళన

హాస్టల్‌ వార్డెనే కారణమని కుటుంబ సభ్యుల ఆరోపణ

ధవళేశ్వరం, న్యూస్‌టుడే: ధవళేశ్వరం గిరిజన సంక్షేమ ఆశ్రమ బాలికోన్నత పాఠశాలలో పదోతరగతి చదువుతున్న విద్యార్థిని(15) మంగళవారం రాత్రి పేలుమందు తాగి ఆత్మహత్యాయత్నానికి పాల్పడి, ఆసుపత్రిలో మృతిచెందిన విషయం తెలిసిందే. ఈ ఘటనలో హాస్టల్‌ వార్డెన్‌ నిర్లక్ష్యమే కారణమని బాలిక తల్లి ఆరోపించారు. సకాలంలో వైద్యసేవలు అందకే తమ కుమార్తె మృతిచెందిందని బోరున విలపించారు. పేలుమందు తాగి అపస్మారక స్థితిలో ఉన్న అక్కకు గింజలతో సహా కుంకుడు పులుసు, ఉప్పు నీరు వార్డెన్‌ తాగించారని మృతురాలి చెల్లి ఆరోపించింది. అంబులెన్సును పిలవలేదని, అమ్మ వచ్చిన తరువాత ఆటోలో ప్రభుత్వ ఆసుపత్రికి తీసుకెళ్లామని, సకాలంలో ఆస్పత్రిలో చేర్చితే అక్క బతికేదని చెప్పింది. బాలిక మృతదేహంతో హాస్టల్‌ వద్ద ధర్నా చేసేందుకు మృతురాలి తల్లి, ఎస్టీ ఎస్సీ సంఘాల నాయకులు వెళుతున్నారన్న సమాచారంతో పోలీసులు వారి ఇంటికి వెళ్లి వారించారు. ఈ కేసులో పోస్టుమార్టం రిపోర్టు వచ్చాకే తదుపరి చర్యలు తీసుకుంటామని సీఐ అడబాల శ్రీను చెప్పారు. విద్యార్థిని మృతికి హాస్టల్‌ వార్డెన్‌ నిర్లక్ష్యం కారణమా అన్న కోణంలో దర్యాప్తు చేస్తున్నామన్నారు. ఆత్మహత్యా యత్నానికి పాల్పడిన విద్యార్థినిని సకాలంలోనే వార్డెన్‌, సిబ్బంది హాస్పటల్‌కు తరలించారని గిరిజన సంక్షేమశాఖ డిప్యూటీ డైరెక్టర్‌ ముక్కంటి చెప్పారు. పోస్టుమార్టం రిపోర్టు ఆధారంగా వార్డెన్‌, ఇతర సిబ్బందిపై చర్యలు తీసుకుంటామన్నారు.