తమ్ముడి ఆత్మహత్యకు కారణమైన అన్న అరెస్టు

కరీంనగర్‌ నేరవార్తలు, న్యూస్‌టుడే: ఆస్తి విషయంలో సొంత అన్న తనను మోసం చేశాడని పేర్కొంటూ తిరమల్‌నగర్‌కు చెందిన తిప్పారపు శ్రీనివాస్‌ సెల్ఫీ వీడియో ద్వారా వివరాలు వెల్ల్లడించి ఆత్మహత్య చేసుకున్న విషయం తెలిసిందే. పొత్తులో నిర్మించుకున్న ఇంటిలో అన్న ఆంజనేయులు, తమ్ముడు శ్రీనివాస్‌ను రానివ్వలేదని, అక్క, అన్నతో కలిసి కొనుగోలు చేసిన భూమి విషయంలో సైతం వారిద్దరు తనను మోసం చేశారని శ్రీనివాస్‌ వివరించారు. పెట్టుబడి పెట్టిన డబ్బును సైతం తిరిగి ఇవ్వకుండా వేధింపులకు గురి చేశారని పేర్కొంటూ శ్రీనివాస్‌ తన బాధను చరవాణిలో రికార్డు చేసుకుని పురుగుల మందు తాగి ఆత్మహత్యకు పాల్పడ్డాడు. మృతుడి భార్య ఇచ్చిన ఫిర్యాదు మేరకు ఒకటో ఠాణా పోలీసులు కేసు నమోదు చేశారు. శుక్రవారం శ్రీనివాస్‌ మృతికి కారణంగా పేర్కొన్న అతని అన్న ఆంజనేయులుని అరెస్టు చేసి రిమాండ్‌కు తరలించినట్లు పోలీసులు తెలిపారు.