Kumaraswamy: ఇక కన్నీరు కార్చను: కుమారస్వామి

మండ్యలో మాట్లాడుతున్న కుమారస్వామి తదితరులు

మండ్య, న్యూస్‌టుడే : ఇకముందు తాను కన్నీరు కార్చేదిలేదని మాజీ ముఖ్యమంత్రి కుమారస్వామి స్పష్టం చేశారు. ఆయన సోమవారం ఇక్కడ మీడియా సమావేశంలో పాల్గొన్నారు. గతంలో అనేక సందర్భాల్లో కన్నీళ్ల పర్యంతమైన విషయాన్ని ప్రస్తావిస్తూ ఆ సంఘటనలు తీవ్ర విమర్శలకు దారితీసిన నేపథ్యంలో ఈ నిర్ణయం తీసుకున్నారు. అలాగని తాను సంఘటనలకు స్పందించకుండా గుండెను రాయిచేసుకున్నట్లు భావించరాదని చెప్పారు. విధానపరిషత్‌ ఎన్నికల్లో ఏ పార్టీకి మద్దతునిచ్చేదీ, తటస్థంగా ఉండేదో అనే విషయాన్ని మంగళవారం ప్రకటిస్తానని చెప్పారు. తాను భాజపాకు మద్దతునిస్తానని ఇప్పటివరకు ఎక్కడా ప్రకటించలేదనే విషయాన్ని గుర్తించాలన్నారు. దళ్‌ కుటుంబ రాజకీయాల గురించి విమర్శించే ముందు కాంగ్రెస్‌ నేత సిద్ధరామయ్య తన పరిస్థితి ఏమిటో ఒక్కసారి ఆలోచిస్తే మంచిదని సలహా ఇచ్చారు. తండ్రీ కొడుకులు శాసనసభ్యులుగా ఉన్న విషయాన్ని విస్మరించారా అని ప్రశ్నించారు.