జీవన సార్థకత

ఇంటి పత్రాలు అందిస్తున్న దేవేంద్రప్ప

గదగ, న్యూస్‌టుడే : గదగ సమీపంలోని సూరణగి గ్రామానికి చెందిన ద్యామణ్ణ దేవేంద్రప్ప నీరలగి, జ్యోతి దంపతులకు వివాహమైన ఎనిమిదేళ్లకు ఒక మగబిడ్డ జన్మించాడు. అతనికి జీవన్‌ అనే పేరు పెట్టి, అల్లారు ముద్దుగా పెంచుకున్నారు. జీవన్‌కు ఆరేళ్ల వయసు ఉన్నప్పుడు 2019 డిసెంబరు 21న మెదడువాపు వ్యాధితో మరణించాడు. కొడుకు పేరు శాశ్వతంగా ఉండాలని తమ గ్రామంలో జీవన్‌ పేరిట ఓ లేఅవుట్ను రూపొందించారు. అందులో 40 ఇంటి స్థలాలను సిద్ధం చేశారు. గ్రామంలో దివ్యాంగులు, వితంతువులు, నిర్వాసితులకు ఆ స్థలాలను వివరణ చేసే ప్రయత్నాలను ప్రారంభించారు. కుమారుడి వైద్య చికిత్సకు తనకున్న ఎనిమిది ఎకరాల పొలంలో మూడెకరాలు విక్రయించారు. ఇప్పుడు తనకు ఉన్న పొలంలో  ఎకరంలో లేఅవుట్ రూపొందించాడు. ఒక్కో లబ్ధిదారునికి 540 చ.అడుగుల విస్తీర్ణంలో స్థలాన్ని ఇవ్వనున్నారు. ఇప్పటికే కొందరికి స్థలాలను పంపిణీ చేశారు. మరో బిడ్డను దత్తత తీసుకోవడం కన్నా.. ఇంటి స్థలాలను దానం చేయడమే ఉత్తమమని భావించి తాము ఈ నిర్ణయాన్ని తీసుకున్నామని ద్యామణ్ణ దేవేంద్రప్ప నీరలగి, జ్యోతి దంపతులు తెలిపారు.