పవిత్రోత్సవాలకు వైభవంగా పూర్ణాహుతి పూజలు

భద్రాచలం, న్యూస్‌టుడే: భద్రాచలం రామాలయంలో శుక్రవారం ప్రత్యేక పూజలు నిర్వహించారు. బంగారు కవచాల అలంకారంలో దేవదేవుడు సుందరంగా కనిపించడంతో భక్తులు పులకించారు. 7న ఆరంభమైన పవిత్ర ఉత్సవాలకు పూర్ణాహుతి పూజలు వైభవంగా కొనసాగించారు. హయగ్రీవ స్వామి జయంతి పురస్కరించుకుని తిరుమంజనం చేశారు. విద్యార్థులకు పుస్తకాలను, స్వామివారి చిత్రపటాన్ని ఈవో శివాజీ అందించారు. వజ్రోత్సవాలు పురస్కరించుకుని సాంస్కృతిక ప్రదర్శనలు ఏర్పాటు చేశారు. శ్రావణ మాసం మూడో శుక్రవారం సందర్భంగా సామూహిక కుంకుమార్చన చేశారు. పవిత్ర ఉత్సవాలతో నిలిచిన నిత్య కల్యాణాలు నేటి నుంచి తిరిగి ప్రారంభమవుతాయని వైదిక పెద్దలు తెలిపారు.