పాలకుల నిర్లక్ష్యంపై ప్రజాగర్జన: కూనంనేని

పాల్వంచ పట్టణం, న్యూస్‌టుడే: పాలన విస్మరించిన పాలకులకు ప్రజా చైతన్యంతో గుణపాఠం చెబుతామని సీపీఐ రాష్ట్ర కార్యదర్శి కూనంనేని సాంబశివరావు చెప్పారు. పాల్వంచ పట్టణ పరిధిలోని పిల్లవాగు, పేటచెరువు, శ్రీనివాసకాలనీ, రాహూల్‌గాంధీనగర్‌, ఇందిరాకాలనీ, హమాలీకాలనీ, సీతారామపట్నం, గాంధీనగర్‌, గొల్లగూడెం, పాతపాల్వంచ, పాలకొయ్యతండాల్లో శుక్రవారం కూనంనేని పర్యటించారు. జూన్‌ 11న కొత్తగూడెంలో జరిగే ‘ప్రజాగర్జన’ సభను జయప్రదం చేయాలని పిలుపునిచ్చారు. సీఎంను నేరుగా కలిసి సమస్యలు చెప్పుకొనే అవకాశం కల్పించాలని ఆయన డిమాండ్‌ చేశారు. పోడు పట్టాల సంఖ్యను కుదించారని.. ఈ విషయంలో పునరాలోచన చేయాలన్నారు. పాల్వంచ మున్సిపాల్టీకి స్థానిక ఎన్నికలు నిర్వహించే వరకు పోరాడతామన్నారు. సీపీఐ రాష్ట్ర సమితి సభ్యుడు ముత్యాల విశ్వనాథం, మండల కార్యదర్శి పూర్ణచందర్‌రావు, పట్టణ సహాయ కార్యదర్శి రాహుల్‌, సుధాకర్‌, వెంకటేశ్వర్లు పాల్గొన్నారు.