మూడు ప్రైవేట్‌ ఆసుపత్రుల సీజ్‌

తనిఖీ చేస్తున్న వైద్యారోగ్యశాఖ సిబ్బంది

ఖమ్మం కమాన్‌బజార్‌, న్యూస్‌టుడే: ఖమ్మం నగరంలో మూడు ప్రైవేట్‌ ఆసుపత్రులను సీజ్‌ చేసినట్లు జిల్లా వైద్య ఆరోగ్యశాఖాధికారి డాక్టర్‌ మాలతి తెలిపారు. ఉన్నతాధికారులకు వచ్చిన ఫిర్యాదుల మేరకు ఖమ్మంలోని వివిధ ఆసుపత్రుల్లో బుధవారం తనిఖీచేశారు. ఈ క్రమంలో నిబంధనలు పాటించని, అనుమతులు లేని, వైద్యులు అందుబాటులో ఉండని ఆదర్శ్‌ హాస్పిటల్‌, తులసీ డెంటల్‌, పాజిటివ్‌ హోమియో కేర్‌పై చర్యలు తీసుకున్నారు. అధికారుల తనిఖీల సమయంలో ఆయా ఆసుపత్రుల్లో లోపాలను గుర్తించారు. ప్రభుత్వ నిబంధనలకు   విరుద్ధంగా ఆసుపత్రులను నిర్వహిస్తున్నట్లు తేల్చారు. ఆదర్శ్‌ హాస్పిటల్‌లో అనైతిక వైద్యం చేస్తున్నట్లు వివరించారు. మిగిలిన రెండింటిని రిజిస్ట్రేషన్‌ చేయించకుండా, వైద్య నిపుణులు లేకుండా చికిత్సలు అందిస్తున్నట్లు వెల్లడించారు. షోకాజ్‌ నోటీసులు జారీ చేసి సమాధానం కోరారు. తనిఖీల్లో డిప్యూటీ డీఎంహెచ్‌ఓ సైదులు, డెమో కాశీనాథ్‌ పాల్గొన్నారు.