యాగంటి పెద్దకోనేరులో ఊడిన మండపం రాయి

యాగంటి (బనగానపల్లి పట్టణం), న్యూస్‌టుడే: బనగానపల్లి మండలంలోని ప్రముఖ పుణ్యక్షేత్రమైన యాగంటి ఉమామహేశ్వరస్వామి ఆలయ ప్రాంగణంలోని పెద్దకోనేరు మధ్యలోని మండపం రాయి ఊడిపోయిన విషయం ఆలస్యంగా వెలుగు చూసింది. సంబంధిత పురావస్తు శాఖ అధికారులు వచ్చి పరిశీలించినా ఎటువంటి చర్యలు తీసుకోలేదని భక్తులు వాపోతున్నారు. ఆలయం సమీపంలో మైనింగ్‌ పనులు జరుగుతుండంతో ఇటువంటి సంఘటనలు జరుగుతున్నాయని భక్తులు చెబుతున్నారు. కోనేరులో పుణ్యస్నానాలు చేసే భక్తులకు ఎటువంటి ప్రమాదం జరుగుతుందోనని పలువురు వాపోతున్నారు.  గతంలోనూ పలు స్తంభాలు దెబ్బతినడంతో వాటిని సరిచేశారు. ఏదేమైనా అధికారులు తగిన చర్యలు తీసుకోవాల్సిన అవసరముంది. పెద్దకోనేరు మధ్యలోని మండపం రాయి పడిన విషయం నిజమే, పురావస్తుశాఖ అధికారులు పరిశీలించి వెళ్లారని ఆలయాధికారి చంద్రశేఖర్‌రెడ్డి శుక్రవారం తెలిపారు.