చేతికందని నీరు

పెచ్చెరువులో పనిచేయని చేతిపంపు

భక్తులు పెచ్చెర్వు వద్ద ఉన్న చేతిపంపు నీటిని ఎక్కువగా వినియోగిస్తుంటారు. గతేడాది పాడైనా ఇప్పటి వరకు మరమ్మతులు చేయలేదని గూడెం చెంచులు చెబుతున్నారు. నాగలూటి- పెచ్చెర్వు మధ్య నడక దారిలో భక్తుల సౌకర్యార్థం ఏర్పాటు చేసిన చేతిపంపులకు మరమ్మతులు చేపట్టలేదని పాదచారులు చెబుతున్నారు.పెచ్చెర్వు గూడెంలో పురాతన బావి నీటిని అన్నదాన శిబిరాలతో పాటు భక్తులకు తాగునీటి అవసరాలకు వినియోగిస్తారు. ఈ బావి మొత్తం చెత్తా చెదారంతో నిండిపోయింది.

కోనీరు తాగలేరు

నాగలూటి క్షేత్రం శ్రీశైల ముఖద్వారం. ఇక్కడ మొదటి మెట్టుకు పూజ చేసి గిరికోనపై నడిచి వెళ్తారు. ఇక్కడి కోనేరులో నీటిని సీసాల్లో తీసుకెళ్తుంటారు. ప్రస్తుతం కోనేరులో ఆకులు, చెత్తాచెదారం పేరుకుపోయింది. నీటిలో పాచిని తొలగించి బ్లీచింగ్‌ చేసే పనులు ఇంకా మొదలు పెట్టలేదు. అన్నదాన శిబిరాలు నిర్వహించే వారే శుభ్రత పనులు చేసుకుంటున్నారు. అధికారులు ఇప్పటికైనా స్పందించి సౌకర్యాలు కల్పించాలని భక్తులు కోరుతున్నారు.