అబ్కారీ గోదాంలో మంటలు

అగ్నిప్రమాదం జరిగిన ప్రాంతాన్ని పరిశీలిస్తున్న మేయర్‌ సుభాష్‌ సింగ్‌ తదితరులు

కటక్‌, న్యూస్‌టుడే: కటక్‌లో మంగళవారం భారీ అగ్నిప్రమాదం సంభవించింది. ఉదయం ఈ ఘటన జరగడంతో ప్రాణనష్టం జరగలేదు. పోలీసులు అందించిన వివరాల ప్రకారం.. సబ్‌ రిజిస్టర్‌ కార్యాలయం పక్కన ఉన్న అబ్కారీ శాఖ గోదాం ఉంది. దాడుల్లో దొరికిన మద్యం, నాటుసారా, గంజాయి, స్పిరిట్‌ ఇందులో ఉంచుతారు. గోదాంకు ఆనుకుని ఉన్న చిన్న హోటల్‌లో గ్యాస్‌ సిలిండర్‌ పేలడంతో అగ్ని గోదాంకు వ్యాపించింది. స్పిరిట్‌, మద్యం ఉండడంతో మంటలు తీవ్రంగా ఎగిసి పడ్డాయి. దీంతో చుట్టుపక్కల నివాసితులు భయాందోళనకు గురయ్యారు. అగ్నిమాపక సిబ్బంది ఘటనా స్థలానికి చేరుకొని మంటలు అదుపు చేశారు. ఉదయం 10 గంటల తర్వాత సమీపంలోని సబ్‌ రిజిస్టర్‌ కార్యాలయానికి వందలాదిమంది వస్తుంటారు. ప్రమాదం ఏడు గంటలకు జరగడంతో ప్రాణాపాయం తప్పిందని పోలీసులు తెలిపారు. సమాచారం అందుకున్న కటక్‌ మేయర్‌ ఇతర అధికారులు ఘటనా స్థలానికి చేరుకొని సమీక్షించారు.