వారధి కట్టి.. ఓటు అడగండి

కర్ర వంతెనపై రాకపోకలు చేస్తున్న గ్రామస్థులు

రాయగడ గ్రామీణం, న్యూస్‌టుడే: వారధి కట్టి ఓట్లు అడగాలని కంజసరి గ్రామస్థులు అంటున్నారు. బిసంకటక్‌ నియోజకవర్గం కల్యాణ్‌ సింగుపూర్‌ సమితి సింగారి పంచాయతీలోని కంజసరి గ్రామం నాగావళి నదికి అవతల ఉంది. గ్రామస్థులు ఏదైనా అవసరం నిమిత్తం నది దాటవలసిన పరిస్థితి. అందుకోసం వేసవి సమయంలో కర్రలతో వంతెన నిర్మించుకుని పంచాయతీకి రాకపోకలు సాగిస్తుంటారు. వర్షాకాలంలో నదిలో నీటి ప్రవాహం పెరిగి వంతెన విరిగిపోతే తీవ్ర ఇబ్బందులు ఎదుర్కొంటున్నారు. మళ్లీ వేసవిలోనే వంతెన నిర్మాణం చేసుకుంటారు. రాష్ట్ర న్యాయశాఖ మంత్రి గత పదేళ్లుగా ఈ నియోజక వర్గానికి ప్రాతినిధ్యం వహిస్తున్నా ఎలాంటి అభివృద్ధి పనులు చేయలేదని వారు ఆరోపిస్తున్నారు. ఎన్నికల సమయంలో ఓట్లు అడగడానికి నాయకులు వస్తారు తప్ప తమ సమస్య ఎవరూ పట్టించుకోవడం లేదని వాపోయారు. పలుమార్లు సమితి సమావేశంలో ప్రస్తావించినా ఫలితం లేకపోవడంతో వారధి నిర్మిస్తేనే ఓట్లు వేస్తామని, లేని పక్షంలో ఎన్నికలు బహిష్కరిస్తామని గ్రామస్థులు హెచ్చరిస్తున్నారు.