ఇంటర్‌ మూల్యాంకనం 50 శాతం పూర్తి

అధ్యాపకులకు సూచనలు చేస్తున్న తవిటినాయుడు

పార్వతీపురం పట్టణం, న్యూస్‌టుడే: కొత్తగా ఏర్పడిన జిల్లాలో తొలిసారిగా ఇంటర్మీడియట్‌ మూల్యాంకనం నిర్వహిస్తున్నామని, ఇప్పటి వరకు 50 శాతం దాటి జవాబుపత్రాల మూల్యాంకనం పూర్తి చేసినట్లు క్యాంపు అధికారి ఎస్‌.తవిటినాయుడు తెలిపారు. బుధవారం అధ్యాపకులతో సమావేశం నిర్వహించి సూచనలు, సలహాలు అందించారు. ఎటువంటి పొరపాట్లకు తావివ్వకుండా చిత్తశుద్ధితో బోర్డు ఆదేశాలు, నిబంధనలకు లోబడి మూల్యాంకనం చేయాలని సూచించారు. అనంతరం ఆయన ‘న్యూస్‌టుడే’తో మాట్లాడుతూ.. జిల్లాలో మూల్యాంకనం కోసం 70,408 జవాబు పత్రాలు రాగా సుమారు 39 వేల వరకు మూల్యాంకనం జరిపినట్లు వివరించారు. వచ్చే నెల రెండో వారంలో ఫలితాలు ఇచ్చేందుకు అవకాశం ఉందన్నారు. కార్యక్రమంలో కళాశాల ప్రిన్సిపల్‌ జె.రామారావు, ఏసీ జోనల్‌ అధికారి పి.శంకరరావు, చీఫ్‌ కోడింగ్‌ అధికారి నాగేశ్వరరావు, స్కానింగ్‌ ఇన్‌ఛార్జిగా ఎ.రాజు పాల్గొన్నారు.