గ్రామస్థాయిలో సమగ్ర అభివృద్ధి ప్రణాళిక : కలెక్టర్‌

అధికారులతో సమీక్ష నిర్వహిస్తున్న కలెక్టర్‌ దినేష్‌కుమార్‌ 

ఒంగోలు గ్రామీణం, న్యూస్‌టుడే: వచ్చే అయిదేళ్లలో ఉపాధి హామీ పథకం కింద చేపట్టబోయే పనులకు సంబంధించి గ్రామస్థాయిలో సమగ్ర అభివృద్ధి ప్రణాళిక రూపొందించాలని కలెక్టర్‌ దినేష్‌కుమార్‌ సూచించారు. ఉపాధి హామీ అనుసంధాన పనుల ప్రగతిపై సంబంధిత అధికారులతో ప్రకాశం భవన్‌లో గురువారం సమీక్షా సమావేశం నిర్వహించారు. ఈ సందర్భంగా మాట్లాడుతూ... ఉపాధి హామీ నిధులను గ్రామాల అభివృద్ధికి సమర్థంగా వినియోగించడంపై దృష్టి సారించాలన్నారు. స్థానిక అవసరాలను తెలుసుకుని వచ్చే అయిదేళ్లలో శాఖల వారీగా ఆయా పనులు చేపట్టేందుకు తక్షణ, దీర్ఘకాలిక ప్రణాళికలు రూపొందించాలని దిశా నిర్దేశం చేశారు. అభివృద్ధి పనులు చేపట్టడం ద్వారా వచ్చే అయిదేళ్లలో కూలీలకు కలిగే ప్రయోజనాన్ని వివరించాలన్నారు. పనుల నాణ్యత  విషయంలో రాజీ పడరాదన్నారు. సమావేశంలో డ్వామా పీడీ శీనారెడ్డి, డీపీవో నారాయణరెడ్డి, జడ్పీ సీఈవో జాలిరెడ్డి, ఆర్‌డబ్ల్యూఎస్‌ ఎస్‌ఈ మర్దన్‌అలీ, పశుసంవర్థకశాఖ అధికారిణి బేబిరాణి తదితరులు పాల్గొన్నారు.