మడుగుల్లో అడుగులెలా జగనన్నా!

గిద్దలూరు నగర పంచాయతీలోని జగన్న కాలనీల్లో రహదారులు బురద మడుగులను తలపిస్తున్నాయి. నగర పంచాయతీ అధికారులు కాలనీలో రహదారులు మెరుగు పరచకుండా ప్లాట్లు వేసి లబ్ధిదారులకు అందజేశారు. ఇటీవల కురిసిన వర్షాలకు గిద్దలూరు - కృష్ణంశెట్టిపల్లె రహదారిలో ఉన్న ఉద్యాన శాఖ స్థలంలోని లేఅవుట్లలో అంతర్గత రహదారులు బురదమయంగా మారాయి. ప్రధాన రహదారిలో నీరు నిలిచి నడిచి వెళ్లేందుకు కూడా వీలులేకుండా మారింది. నిర్మాణ సామగ్రి ఆటోలు, ట్రాక్టర్లలో తరలించేందుకు వీలు కావడం లేదు. ఇప్పటికైనా అంతర్గత రహదారులు, ప్రధాన రహదారులను మెరుగు పర్చాలని లబ్ధిదారులు కోరుతున్నారు. 

 - న్యూస్‌టుడే, గిద్దలూరు పట్టణం