పోలీసుల అదుపులో రవితేజ హత్య కేసు నిందితులు!

సింగరాయకొండ గ్రామీణం, న్యూస్‌టుడే: లారీతో ఢీకొట్టి పసుపులేటి రవితేజను హత్య చేసిన ప్రధాన నిందితులను సోమవారం వేకువ జామున పోలీసులు అదుపులోకి తీసుకున్నట్లు సమాచారం. రెండో వైస్‌ ఎంపీపీ ఎన్నిక సమయంలో వైకాపాలోని ఇరువర్గాల మధ్య తలెత్తిన విభేదాల కారణంగా... పదహారో నంబరు జాతీయ రహదారిపై కనుమళ్ల సమీపంలో గురువారం రాత్రి ఈ ఘటన చోటుచేసుకుంది. నిందితులను పట్టుకునేందుకు... ఎస్పీ మలికా గార్గ్‌ ఆదేశాల మేరకు దర్శి డీఎస్పీ నారాయణస్వామిరెడ్డి ప్రత్యేక పోలీసు బృందాలతో వివిధ ప్రాంతాల్లో గాలింపు చేపట్టారు. ఎట్టకేలకు అదుపులోకి తీసుకుని పూర్తిస్థాయిలో విచారిస్తున్నట్లు తెలిసింది. రెండు రోజుల్లో వారిని న్యాయస్థానంలో హాజరు పరిచే అవకాశం ఉన్నట్లు సమాచారం. హత్య జరిగిన మరుసటి రోజు... స్థానిక పోలీసు స్టేషన్‌ ఆవరణలో హత్యకు వినియోగించిన లారీని తగులబెట్టిన వారు, శాంతిభద్రతలకు విఘాతం కలిగించి ఆర్టీసీ బస్సుల అద్దాలు ధ్వంసం చేసిన ఆందోళనకారులను గుర్తించి తగిన చర్యలు చేపడతామని పోలీసు అధికారులు తెలిపారు.